یوکرین آخرکار امریکہ کے سامنے گھٹنے ٹیکنے پر مجبور

سچ خبریں:امریکہ اور یوکرین نے مشترکہ فنڈ کے قیام اور نایاب قدرتی وسائل تک رسائی کے معاہدے پر دستخط کر دیے۔ معاہدے کا مقصد سرمایہ کاری کو فروغ دینا اور روس کو واضح پیغام دینا ہے۔

قطر کے معروف نیوز چینل الجزیرہ کی رپورٹ کے مطابق امریکی محکمہ خزانہ نے اعلان کیا ہے کہ امریکہ اور یوکرین نے ایک تاریخی معاہدے پر دستخط کیے ہیں جس کے تحت امریکہ کو یوکرین کے نایاب قدرتی وسائل تک رسائی حاصل ہو گی۔

یہ بھی پڑھیں:وائٹ ہاؤس میں زلنسکی کی تحقیر؛ امریکہ نے یوکرین کو کیسے جنگ کے دلدل میں دھکیلا؟  

رپورٹ کے مطابق دونوں ممالک کے درمیان یہ معاہدہ یوکرین کی تعمیرِ نو اور سرمایہ کاری کے فروغ کے لیے مشترکہ فنڈ کے قیام کے تحت طے پایا ہے۔

امریکی محکمہ خزانہ نے دعویٰ کیا ہے کہ یہ معاہدہ روس کے لیے ایک واضح پیغام ہے کہ امریکی حکومت، یوکرین کو آزاد، خودمختار اور مستحکم ریاست بنانے کے لیے پرعزم ہے۔

یوکرین کی وزیرِ معیشت یولیا سویریدنکو نے کہا کہ امریکہ اور یوکرین کے درمیان مشترکہ فنڈ کے قیام کا معاہدہ ہو گیا ہے، جس کا مقصد عالمی سطح پر سرمایہ کاری کو یوکرین کی طرف راغب کرنا ہے۔

انہوں نے واضح کیا کہ اس معاہدے کے باوجود، یوکرین کی زمین اور پانیوں میں موجود تمام قدرتی وسائل پر مکمل ملکیت اور کنٹرول حکومتِ یوکرین کے پاس ہی رہے گا۔

انہوں نے کہا کہ اس بات کا فیصلہ صرف یوکرین کرے گا کہ کن وسائل کا استخراج کیا جائے اور کس علاقے میں، اور یہ بات معاہدے میں شفاف انداز سے درج ہے۔

معاہدے کے مطابق فنڈ کی ساخت 50/50 کی بنیاد پر ہو گی اور اس کا انتظام کییف اور واشنگٹن دونوں ممالک مشترکہ طور پر کریں گے۔

دوسری جانب خبر رساں ادارے بلومبرگ نے رپورٹ کیا ہے کہ یہ معاہدہ امریکہ کو یوکرین کے قدرتی وسائل، خصوصاً ایلومینیم، گریفائٹ، تیل اور قدرتی گیس تک رسائی اور سرمایہ کاری کے نئے منصوبے شروع کرنے کے مواقع فراہم کرے گا۔

ادھر امریکی ویب سائٹ اکسیوس نے یوکرینی نائب وزیرِ معیشت کے حوالے سے رپورٹ کیا ہے کہ کییف کو توقع ہے کہ یہ معاہدہ حتمی مراحل طے کر کے جلد دستخط ہو جائے گا، حالانکہ آخری لمحات میں کچھ رکاوٹیں سامنے آئی تھیں۔

یوکرینی نائب وزیر نے اس خیال کو مسترد کیا کہ یہ معاہدہ امریکہ کی سابقہ دفاعی حمایت کا بدلہ ہے۔ ان کا کہنا تھا کہ یہ معاہدہ دراصل یوکرین میں امریکی سرمایہ کاری کے لیے ایک پلیٹ فارم فراہم کرے گا تاکہ امریکہ اپنے دفاعی کردار سے اقتصادی فائدہ بھی حاصل کر سکے۔

اسی حوالے سے امریکی وزیر خزانہ نے فاکس نیوز سے بات چیت کرتے ہوئے دعویٰ کیا کہ یہ معاہدہ دونوں ممالک کے لیے ون-ون ڈیل ہے۔

مزید پڑھیں:امریکہ اور یورپ کے درمیان عدم اعتماد کی خلیج؛ ٹرمپ اتحادیوں کو کیوں کمتر سمجھتے ہیں؟

 ان کے مطابق سابق صدر ڈونلڈ ٹرمپ چاہتے ہیں کہ امریکہ کے اقتصادی مفادات کو اجاگر کر کے روس اور یوکرین کو مذاکرات کی میز پر لایا جائے۔