2018  میں ٹرمپ نے نیٹو سےعلیحدگی کا ارادہ ظاہر کیوں کیا تھا ؟

سچ خبریں: نیٹو کے سابق سیکرٹری جنرل جینس اسٹولٹنبرگ نے انکشاف کیا ہے کہ 2018 میں امریکی صدر ڈونلڈ ٹرمپ کی دھمکیوں کے نتیجے میں یہ فوجی اتحاد ٹوٹنے کے قریب پہنچ گیا تھا۔ 

انہوں نے اپنی آئندہ شائع ہونے والی سوانح عمری "میری کمان میں” میں اس بحران کی تفصیلات بیان کی ہیں۔

اسٹولٹنبرگ کے مطابق، 2018 میں برسلز میں ہونے والی نیٹو سربراہی کانفرنس سے کچھ دیر پہلے، صدر ٹرمپ نے سخت شکایات کا اظہار کرتے ہوئے کہا کہ امریکہ اتحاد کے 80 سے 90 فیصد اخراجات برداشت کر رہا ہے اور اب وہ ایسا کرنے کو تیار نہیں ہے۔ انہوں نے نیٹو سے امریکہ کے انخلا کی واضح دھمکی دی۔

سابق سیکرٹری جنرل کے حوالے سے بتایا گیا کہ ٹرمپ نے کہا تھا، دیکھیں، اگر ہم نکل گئے تو واقعی نکل جائیں گے۔ آپ کو نیٹو کی سخت ضرورت ہے۔ ہمیں نیٹو کی ضرورت نہیں ہے۔ اسٹولٹنبرگ نے مزید کہا کہ اگر امریکہ اس فوجی بلاک سے نکل جاتا تو یہ اتحاد ختم ہو جاتا۔

اس واقعے کے بعد، ٹرمپ نے اس اجلاس کے دوران اسی طرح کے بیانات دیتے ہوئے کہا کہ امریکہ کو نیٹو کی ضرورت نہیں ہے اور وہ اپنا کام خود کرے گا، جب تک کہ یورپی اراکین اپنی فوجی اخراجات جی ڈی پی کے 2 فیصد تک نہ بڑھا دیں۔ انہوں نے علیحدگی کی دھمکی دیتے ہوئے کہا تھا کہ اب میرے یہاں رہنے کی کوئی وجہ نہیں ہے۔

ٹرمپ کے اس رویے نے اتحاد کے ٹوٹنے کے خدشات کو ہوا دی۔ اسٹولٹنبرگ کے مطابق، اس وقت کی جرمن چانسلر انگیلا مرکیل اور فرانس کے صدر ایمانوئل میکرون نے کشیدگی کم کرنے کی کوشش کی، جبکہ ہالینڈ کے سابق وزیر اعظم اور نیٹو کے موجودہ سیکرٹری جنرل مارک روٹے نے یورپی اراکین کی جانب سے 33 ارب ڈالر کے اضافی فوجی اخراجات کا حوالہ دے کر ٹرمپ کو نیٹو میں باقی رہنے پر راضی کیا۔

بیانات کے مطابق، ٹرمپ اس شرط پر نیٹو میں رہنے پر راضی ہوئے کہ فوجی اخراجات میں یہ اضافہ ان کے کھاتے میں ڈالا جائے گا اور انہیں اس کا کھلم کھلا سہرا دیا جائے گا۔

اسٹولٹنبرگ نے زور دیا کہ اگر ٹرمپ نیٹو سے نکل گئے ہوتے تو نیٹو معاہدہ اور اس کی سیکیورٹی گارنٹی بے معنی ہو جاتی۔ انہوں نے اس بات پر بھی روشنی ڈالی کہ اس واقعے نے نیٹو کی امریکی شراکت پر انحصار کی واضح عکاسی کی۔

دوسری جانب، ماسکو نے حالیہ برسوں میں نیٹو کی فوجی توسیع پر تشویش کا اظہار کیا ہے اور بارہا یورپ کی مشرقی سرحدوں کی طرف اس اتحاد کے پھیلاؤ کو یوکرائن بحران کی ایک بنیادی وجہ قرار دیا ہے۔ کریملن کے ترجمان دمیتری پیسکوف نے کہا ہے کہ نیٹو غیر رسمی طور پر روس کے ساتھ جنگ میں مصروف ہے۔