یوکرین کی سلامتی کی ذمہ داری یورپ پر ہوگی:امریکی نائب صدر

یوکرین کی سلامتی کی ذمہ داری یورپ پر ہوگی:امریکی نائب صدر

امریکی ٹی وی چینل فاکس نیوز سے گفتگو میں ونس نے کہا کہ یوکرین اپنی علاقائی سالمیت کے تحفظ کے لیے ضمانتیں چاہتا ہے تاکہ دوبارہ روسی حملے کا شکار نہ ہو۔ ان کے مطابق، روس یوکرین کے ان حصوں پر کنٹرول چاہتا ہے جو اس وقت قبضے میں ہیں اور ان علاقوں پر بھی نظر رکھے ہوئے ہے جو ابھی تک روس کے زیر قبضہ نہیں۔

ونس نے مزید کہا کہ امریکہ یوکرین کی حمایت ضرور کرے گا، تاہم بنیادی ذمہ داری یورپی اتحادیوں پر عائد ہوتی ہے۔امریکی نائب صدر نے ارب پتی صنعتکار ایلان مسک کے تیسرے سیاسی جماعت بنانے کے ارادے پر بھی بات کرتے ہوئے کہا کہ یہ اقدام مسک کی "غلطی” ہوگی۔ انہوں نے واضح کیا کہ ان کی نہ تو مسک سے اور نہ ہی کسی دوسرے بڑے مالی معاون سے انتخابات 2028 کے حوالے سے کوئی بات چیت ہوئی ہے۔

امریکی جریدے پالیٹیکو نے یورپی حکام کے حوالے سے رپورٹ دی ہے کہ پینٹاگون نے اپنے اتحادیوں کو بتایا ہے کہ واشنگٹن یوکرین کو سلامتی کی ضمانت دینے میں محدود کردار ادا کرے گا۔ اس موقف نے یورپی ممالک کو تشویش میں مبتلا کر دیا ہے کیونکہ ٹرمپ انتظامیہ کا دباؤ ہے کہ یوکرین کی طویل مدتی سلامتی کی ضمانت یورپ فراہم کرے۔

ادھر وال اسٹریٹ جرنل نے رپورٹ کیا ہے کہ ٹرمپ کی ٹیم روسی اور یوکرینی حکام کے درمیان براہِ راست ملاقات کرانے کی کوشش کر رہی ہے تاکہ جنگ کو ختم کرنے اور خونریزی روکنے کے لیے کسی سمجھوتے تک پہنچا جا سکے۔