یمن کے شہر مأرب پر سعودی لڑاکا طیاروں کے وسیع حملے

?️ 16 دسمبر 2021

سچ خبریں:سعودی جارح اتحاد کے لڑاکا طیاروں نے جمعرات کو یمنی صوبے مأرب پر شدید بمباری کی۔
المسیرہ چینل کی رپورٹ کے مطابق سعودی جارح اتحاد کے لڑاکا طیاروں نے گذشتہ 24 گھنٹوں کے دوران صوبہ مأرب کے مختلف علاقوں میں اپنے فضائی حملے تیز کر دیے ہیں،رپورٹ کے مطابق یمنی میڈیا نے بتایا ہے کہ گزشتہ 24 گھنٹوں کے دوران سعودی جارح اتحاد کے لڑاکا طیاروں نے مأرب کے مختلف علاقوں پر متعدد بار بمباری کی ہے۔

سعودیوں نے یمنی مزاحمتی قوتوں کو مأرب میں وسیع پیمانے پر پیش قدمی سے روکنے کے لیےاس صوبے پر اپنے حملے تیز کر دیے ہیں،یادرہے کہ حال ہی میں یمنی انصاراللہ کی سیاسی کونسل کے رکن محمد البخیتی نے مأرب کی لڑائی کے بارے میں ایک تقریر میں کہاکہ یمن کی مزاحمتی قوتیں مأرب میں حتمی فتح حاصل کرنے کے قریب ہیں۔

انہوں نے مزید کہاکہ یمن کے عوام جلد از جلد مأرب کی آزادی چاہتے ہیں، ہماری مسلح افواج مأرب کو آزاد کرانے کے لیے عوام کے دباؤ میں ہیں جبکہ اس صوبے میں جارحین کی شکست دیگر محاذوں پر ان کی شکست کی طرح یقینی ہے،البخیتی نے مزید کہا کہ سعودی اور ان کے اتحادی اس بات سے بخوبی واقف ہیں کہ یمنی فورسز کا مأرب شہر پر کنٹرول ان کے لیے بدترین صورت حال ہے اس لیے کہ اس صوبے کی آزادی یمن کے خلاف جامع محاصرہ کے خاتمے کا باعث بنے گی۔

انہوں نے کہا کہ جارحیت پسند اب مأرب کے محاذ پر یمنی افواج کی وسیع پیش قدمی کو چھپانے کی کوشش کر رہے ہیں،تاہم حملہ آوروں کے لیے ہمارا پیغام ہے کہ وہ اب ہم پر محاصرہ کرنے کے قابل نہیں ہیں۔