یمن میں امارات کے حمایت یافتہ افواج پر سعودی فضائی حملے

?️ 2 جنوری 2026

یمن میں امارات کے حمایت یافتہ افواج پر سعودی فضائی حملے

یمن کے صوبہ حضرموت میں سعودی عرب اور متحدہ عرب امارات کے حمایت یافتہ گروہوں کے درمیان کشیدگی ایک نئے مرحلے میں داخل ہو گئی ہے۔ خبروں کے مطابق سعودی عرب کے جنگی طیاروں نے متعدد بار جنوبی عبوری کونسل (STC) کے ٹھکانوں پر فضائی حملے کیے ہیں، جو امارات کی حمایت یافتہ سمجھی جاتی ہے۔

میڈیا رپورٹس کے مطابق سعودی عرب سے وابستہ فورسز، جنہیں "درع الوطن” یا "اسپرمِیهن” کہا جاتا ہے، اور جنوبی عبوری کونسل کے جنگجوؤں کے درمیان حضرموت کے علاقے الخشعہ میں شدید جھڑپیں ہوئیں۔ یہ جھڑپیں درمیانے اور بھاری ہتھیاروں کے استعمال کے ساتھ جاری رہیں۔

عینی شاہدین کے مطابق زمینی لڑائی کے دوران سعودی جنگی طیاروں نے جنوبی عبوری کونسل کے ٹھکانوں کو نشانہ بنایا، جس سے علاقے میں کشیدگی مزید بڑھ گئی۔

واضح رہے کہ اس سے قبل سعودی وزارت خارجہ نے ایک بیان میں امارات سے مطالبہ کیا تھا کہ وہ 24 گھنٹوں کے اندر یمن سے اپنی تمام افواج نکالے اور ملک میں کسی بھی فریق کو فوجی یا مالی مدد فراہم کرنا بند کرے۔

تجزیہ کاروں کے مطابق حالیہ ہفتوں میں جنوبی یمن کے بعض علاقوں سے سعودی انخلا اور وہاں اماراتی اثر و رسوخ میں اضافے کے بعد طاقت کا توازن جنوبی عبوری کونسل کے حق میں جاتا دکھائی دے رہا ہے۔ اس صورتحال نے یمن بحران کو مزید پیچیدہ اور خطرناک بنا دیا ہے۔

ماہرین کا کہنا ہے کہ ابوظبی یمن کے معاملے میں اپنا اثر و رسوخ بڑھانے کی کوشش کر رہا ہے، جس کے نتیجے میں ملک کے دوبارہ ٹوٹنے، تشدد میں اضافے اور تیل سے مالا مال علاقوں پر کنٹرول کی جنگ کے دوران بڑے پیمانے پر انسانی المیوں کا خدشہ پیدا ہو گیا ہے۔