ہونڈوراس میں انتخابی بحران،ٹرمپ کی مبینہ مداخلت اور حکمران جماعت کا نتائج ماننے سے انکار

?️ 9 دسمبر 2025

 ہونڈوراس میں انتخابی بحران،ٹرمپ کی مبینہ مداخلت اور حکمران جماعت کا نتائج ماننے سے انکار

 ہونڈوراس میں صدارتی انتخابات کو ایک ہفتہ گزر جانے کے باوجود ملک اب تک سیاسی بے یقینی کا شکار ہے اور حتمی نتائج سامنے نہیں آ سکے۔ حکمران جماعت لیبرے نے انتخابی نتائج کو تسلیم کرنے سے انکار کرتے ہوئے الزام عائد کیا ہے کہ امریکی صدر ڈونلڈ ٹرمپ نے انتخابی عمل میں دباؤ اور مداخلت کی، جس سے عوامی رائے کو متاثر کیا گیا۔

حکمران جماعت کی امیدوار ریکسی مونکادا نے دعویٰ کیا کہ ابتدائی نتائج منتقل کرنے والے نظام  کے سورس کوڈ میں رد و بدل کیا گیا اور نتائج شائع کرنے والی ویب سائٹس کئی دنوں تک اپ ڈیٹ نہیں کی گئیں۔ ان کے مطابق یہ اقدامات عوامی خودمختاری کو کمزور کرنے کے مترادف ہیں اور یہ ایک منظم انتخابی دھاندلی کی کوشش ہے۔

سابق صدر مانوئل زیلایا نے بین الاقوامی اداروں سے مطالبہ کیا ہے کہ وہ مبینہ بیرونی مداخلت کا نوٹس لیں اور پورے انتخابی عمل کی تحقیقات کرائی جائیں۔ حکمران جماعت نے مکمل طور پر انتخابات کو منسوخ کرنے کا مطالبہ بھی کیا ہے۔

ابتدائی غیر حتمی نتائج کے مطابق قدامت پسند نیشنل پارٹی کے امیدوار نصری آسفورا معمولی برتری کے ساتھ پہلے نمبر پر ہیں، جب کہ لبرل پارٹی کے سالوادور نصرالله دوسرے نمبر پر اور حکمران جماعت کی امیدوار ریکسی مونکادا تیسرے نمبر پر ہیں۔

سیاسی کشیدگی میں اس وقت مزید اضافہ ہوا جب ٹرمپ کی جانب سے سابق صدر خوان اورلاندو ہرنانڈیز کو معافی دی گئی، جنہیں امریکہ میں منشیات اور اسلحہ کے سنگین جرائم پر طویل قید کی سزا سنائی جا چکی تھی۔ سیاسی تجزیہ کاروں کا کہنا ہے کہ اگر نتائج کے نظام میں واقعی تکنیکی یا انسانی مداخلت ثابت ہوئی تو اس سے پورے انتخابی عمل کی ساکھ بری طرح متاثر ہو گی اور ملک میں عدم استحکام مزید بڑھ سکتا ہے۔