ہم اسرائیل کو کبھی تسلیم نہیں کریں گے: پاکستانی وزیر خارجہ

سچ خبریں:محمد اسحاق ڈار نے مارکو روبیو سے ملاقات کے بعد صحافیوں سے گفتگو کرتے ہوئے کہا کہ ابراہیم معاہدے کے حوالے سے بہت سی افواہیں گردش کر رہی ہیں۔

انہون نے کہا کہ میں واضح کر دوں کہ پاکستان کا موقف اس سلسلے میں بہت واضح اور مستحکم رہا ہے۔

انہوں نے مزید کہا کہ جب تک فلسطین کو 1967 سے پہلے کے ماڈل کے تحت تسلیم نہیں کیا جاتا اور بیت المقدس اس کا دارالحکومت نہیں بنتا، اس معاملے میں کوئی لچک ممکن نہیں ہوگی۔

پاکستان کے وزیر خارجہ نے زور دیتے ہوئے کہا کہ پاکستان فلسطین اور غزہ کے حوالے سے اپنے دیرینہ موقف کا پابند ہے اور اسرائیل کے حوالے سے اسلام آباد کی پالیسی میں کوئی تبدیلی ایک آزاد فلسطینی ریاست کے قیام کے بغیر نہیں آئے گی۔

واضح رہے کہ چند روز قبل ٹرمپ نے اعلان کیا تھا کہ انہوں نے پاکستان، سعودی عرب اور قطر سمیت متعدد ممالک سے ابراہیم معاہدے میں شامل ہونے کی درخواست کی ہے۔