کینیڈا نئے بجٹ کے ذریعے امریکہ پر انحصار کم کرنے کی تلاش میں

کینیڈا نئے بجٹ کے ذریعے امریکہ پر انحصار کم کرنے کی تلاش میں

 کینیڈا کے وزیرِاعظم مارک کارنی نے منگل کے روز اپنی حکومت کا پہلا بجٹ پیش کیا، جس کا مقصد امریکہ پر اقتصادی انحصار کم کرنا اور واشنگٹن کی جانب سے لگائے گئے تجارتی محصولات کے دباؤ کا مقابلہ کرنا ہے۔

فرانسیسی خبر ایجنسی کے مطابق، وزیرِاعظم مارک کارنی نے کہا کہ یہ بجٹ کینیڈا کی معیشت کے لیے ایک جواب ہے جو امریکی تجارتی پالیسیوں سے شدید دباؤ میں ہے۔

کارنی، جو اس سال سیاست میں آنے سے پہلے کینیڈا اور برطانیہ کے مرکزی بینکوں کے سربراہ رہ چکے ہیں، کا کہنا ہے کہ وہ اس مشکل دور میں ملک کی قیادت کے لیے بہترین شخص ہیں، خاص طور پر جب امریکہ کے ساتھ تعلقات ڈونلڈ ٹرمپ کی پالیسیوں کے باعث خراب ہو چکے ہیں۔

ٹرمپ کی جانب سے عائد کردہ سٹیل، ایلومینیم اور کاروں پر محصولات نے کینیڈا کی معیشت کو بڑا نقصان پہنچایا ہے، جس سے بیروزگاری بڑھی اور صنعتی شعبے دباؤ میں آ گئے ہیں۔

کارنی نے جنوبی کوریا میں ایک تقریب کے دوران کہا:امریکی تجارتی پالیسیوں نے ہمارے لیے مشکلات پیدا کی ہیں، اور اب سوال یہ ہے کہ ہم ترقی کہاں سے حاصل کریں؟ اس بجٹ کا مقصد اسی سوال کا جواب دینا ہے۔

اگرچہ بجٹ کی مکمل تفصیلات تاحال ظاہر نہیں کی گئیں، مگر توقع ہے کہ اس میں دفاعی اخراجات میں اضافہ، قومی منصوبوں کے لیے فنڈز، اور نیٹو کے اہداف کے مطابق سرمایہ کاری شامل ہوگی، تاکہ کینیڈا اپنی اقتصادی خودمختاری کو مضبوط بنا سکے۔

وزیرِاعظم نے اس سے قبل کہا تھا کہ امریکہ کے ساتھ قریبی اقتصادی تعلقات کا دور ختم ہو چکا ہے، اور ان کی حکومت کی پہلی مالیاتی پالیسی کا بنیادی مقصد امریکہ پر انحصار کم کرنا ہے  خواہ وہ معیشت میں ہو یا سلامتی میں۔

کارنی نے وعدہ کیا ہے کہ آئندہ دس برسوں میں امریکہ کے علاوہ دیگر ممالک کو برآمدات دوگنی کر دی جائیں گی، جس سے کینیڈا کی آمدنی میں تقریباً 300 ارب کینیڈین ڈالر کا اضافہ متوقع ہے۔