چارلی کرک کے قتل کے بعد ایف بی آئی ڈائریکٹر کش پٹیل کو ہٹانے کے مطالبات زور پکڑ گئے ہیں

چارلی کرک کے قتل کے بعد ایف بی آئی ڈائریکٹر کش پٹیل کو ہٹانے کے مطالبات زور پکڑ گئے ہیں

 معروف قدامت پسند اور صدر ڈونلڈ ٹرمپ کے قریبی حامی چارلی کرک کے قتل کے بعد ایف بی آئی کے سربراہ کش پٹیل کو ہٹانے کے مطالبات زور پکڑ گئے ہیں۔

امریکی جریدے نیوزویک کے مطابق، کرک کو ریاست یوٹا میں ایک تعلیمی تقریب کے دوران فائرنگ کر کے قتل کیا گیا۔ واقعے کے چند گھنٹوں بعد پٹیل نے جلد بازی میں ایک مشتبہ شخص کی گرفتاری کا اعلان کیا، لیکن بعد میں معلوم ہوا کہ وہ اصل قاتل نہیں تھا۔ اصل ملزم ٹائلر رابنسن کو واقعے کے 33 گھنٹے بعد اس کے والد نے حکام کے حوالے کیا۔

پٹیل کی ابتدائی ناکامیوں اور مبہم بیانات نے ریپبلکن اور ٹرمپ کے حامی حلقوں میں شدید ردعمل پیدا کیا۔ قدامت پسند صحافی کرسٹوفر روفو نے مطالبہ کیا کہ پٹیل کو فوری برطرف کیا جائے، جبکہ دیگر شخصیات جیسے جوزف بیگز اور لورا لومر نے بھی ایف بی آئی کی کارکردگی کو شرمناک  قرار دیا۔

نیوزویک کے مطابق، کش پٹیل کے پاس قانون نافذ کرنے یا انٹیلی جنس کا کوئی براہ راست تجربہ نہیں تھا۔ انہیں رواں سال ریپبلکن اکثریت والی سینیٹ نے ڈیموکریٹس کی مخالفت کے باوجود اس عہدے پر تعینات کیا۔ ان کی تقرری پہلے دن سے متنازع رہی ہے کیونکہ ان پر ایف بی آئی کو سیاسی بنانے اور ادارے کے اندر مخالفین کو برطرف کرنے کے الزامات لگتے رہے ہیں۔

پٹیل پہلے ہی جیفری اپسٹین کیس میں شفافیت روکنے کے باعث تنقید کی زد میں تھے اور اب کرک کے قتل نے ان کے خلاف دباؤ کو کئی گنا بڑھا دیا ہے۔ وہ جلد ہی کانگریس کی عدالتی کمیٹیوں کے سامنے گواہی دینے والے ہیں جہاں ان سے ایف بی آئی کی کارکردگی، اپسٹین کیس اور مبینہ سیاسی انتقام کے الزامات پر سوالات کیے جائیں گے۔

چارلی کرک، عمر 31 سال، قدامت پسند نوجوانوں کی تنظیم ٹرننگ پوائنٹ یو ایس اے کے بانی اور ٹرمپ کی انتخابی مہم کے لیے نوجوان ووٹروں کو متحرک کرنے میں اہم کردار ادا کرنے والے رہنما تھے۔ وہ اسرائیل کے کھلے حامی بھی سمجھے جاتے تھے۔