ویکی پیڈیا نے غزہ میں نسل کشی کا صفحہ بند کر دیا

ویکی پیڈیا نے غزہ میں نسل کشی کا صفحہ بند کر دیا

 ویکی پیڈیا کے بانیوں میں سے ایک جِمی ویلز نے اسرائیل کی حمایت میں اور "غیر جانبداری” کا دعویٰ کرتے ہوئے ویب سائٹ پر موجود صفحہ "غزہ میں نسل کشی” کو ایڈیٹ کرنے کے لیے عوامی رسائی بند کر دی۔

جروزلم پوسٹ کے مطابق، جِمی ویلز نے کہا کہ اس صفحے کا متن اسرائیل مخالف ہے اور ویکی پیڈیا کے غیر جانبداری کے اصولوں کے خلاف جاتا ہے، اس لیے اسے عارضی طور پر لاک (بند) کر دیا گیا ہے۔

ویلز نے لکھا یہ مضمون ہمارے معیار پر پورا نہیں اترتا اور اسے فوری توجہ کی ضرورت ہے تاکہ اس کا لہجہ متوازن ہو۔

انہوں نے کہا کہ یہ خاص طور پر حساس اور متنازع موضوعات میں ضروری ہے کہ تحریر میں بیلنس رکھا جائے۔ ویلز نے صارفین سے کہا کہ وہ مضمون کو ایسے انداز میں لکھیں جس میں دونوں پہلو دکھائے جائیں، مثلاً:

"کئی حکومتیں، انسانی حقوق کی تنظیمیں اور عدالتی ادارے اسرائیل کے اقدامات کو نسل کشی قرار دیتے ہیں یا اس سے اختلاف کرتے ہیں۔

لیکن اس فیصلے نے ویکی پیڈیا کے ایڈیٹروں اور دنیا بھر میں سخت ردعمل پیدا کیا۔ ناقدین کا کہنا ہے کہ یہ اقدام غزہ میں ہونے والی نسل کشی کو چھپانے اور صہیونی لابی کے دباؤ میں آنے کے مترادف ہے۔

ایڈیٹرز نے جِمی ویلز پر الزام لگایا کہ وہ جھوٹی غیر جانبداری” دکھا کر اقوام متحدہ، انسانی حقوق کی تنظیموں اور عالمی عدالتِ انصاف کی رپورٹس کو کم اہمیت دے رہے ہیں جن میں غزہ میں اسرائیلی حملوں کو نسل کشی قرار دیا گیا ہے۔

اقوام متحدہ کے مطابق، 7 اکتوبر 2023 سے اب تک اسرائیلی حملوں میں کم از کم 69 ہزار فلسطینی شہید اور 1 لاکھ 71 ہزار زخمی ہوئے ہیں، جن میں زیادہ تر خواتین اور بچے شامل ہیں۔ غزہ کی دوبارہ تعمیر کی لاگت 70 ارب ڈالر تک پہنچنے کا اندازہ ہے۔

یہ تنازع اُس وقت مزید بڑھ گیا جب ریپبلکن پارٹی کے ارکانِ کانگریس نے ویکی پیڈیا پر الزام لگایا کہ کچھ گروہ جان بوجھ کر اسرائیل مخالف مواد شامل کر رہے ہیں۔ انہوں نے ویکی پیڈیا انتظامیہ سے وضاحت طلب کی کہ وہ ایسے صارفین کی نشاندہی اور سزا کیسے دیتے ہیں۔

اسی دوران، ایلون مسک نے ویکی پیڈیا کے مقابلے میں ایک نیا پلیٹ فارم "گروکی پیڈیا” (Grokipedia) لانچ کیا، جس کے بارے میں اس کا دعویٰ ہے کہ یہ مصنوعی ذہانت کی مدد سے بغیر جانبداری کے معلومات فراہم کرے گا۔