سچ خبریں: وینزویلا نے اعلان کیا کہ اس نے فلسطین میں اپنی سفارتی نمائندگی کی سطح کو دفتر سے سفارت خانے تک بڑھا دیا ہے اور فلسطینی اتھارٹی کی وزارت خارجہ نے کاراکاس کے اس اقدام کا خیرمقدم کیا ہے۔
فلسطین الیوم نیوز ایجنسی کی ویب سائٹ کے مطابق وینزویلا نے فلسطین میں اپنی نمائندگی کی سطح کو دفتر سے سفارت خانے تک بڑھا دیا ہے۔
یہ بھی پڑھیں: شیلی کو ایران کے لیے وینزویلا میں تبدیل کرنے کا صیہونیوں کو خوف
رپورٹ کے مطابق اگرچہ وینزویلا نے ابھی تک فلسطین میں اپنے سفارت خانے کے مقام کا اعلان نہیں کیا ہے، تاہم فلسطینی اتھارٹی کی وزارت خارجہ نے وینزویلا کی جانب سے اپنی نمائندگی کی سطح کو دفتر سے سفارت خانے تک بڑھانے کے فیصلے کا خیر مقدم کیا ہے۔
وزارت نے ایک بیان میں کہا کہ وینزویلا کا یہ عمل اپریل 2009 میں وینزویلا کی طرف سے فلسطینی ریاست کو تسلیم کرنے کی عکاسی کرتا ہے اور دونوں دوست ممالک کے درمیان تاریخی تعلقات کی گہرائی اور ہر سطح پر فلسطینی حکومت نیز فلسطینی عوام کے حقوق کے لیے کراکس کی مضبوط حمایت کو ظاہر کرتا ہے۔
بیان میں مزید کہا گیا ہے کہ ہم وینزویلا کے صدر، حکومت اور اس ملک کی عوام کا فلسطینی عوام اور ان کے منصفانہ مقصد کے لیے بے پناہ حمایت اور اس جرأت مندانہ فیصلے کے لیے شکریہ ادا کرتے ہیں۔
مزید پڑھیں: آیت اللہ خامنہ ای کا شیدائی ہوں: وینزویلا کے صدر
فلسطین کی وزارت خارجہ نے تاکید کی کہ مسئلہ فلسطین کو پس پشت ڈالنے اور اسے تباہ کرنے کی کوششوں کے ساتھ ساتھ غاصبانہ قبضے کے ساتھ فلسطینیوں کے خلاف ہونے والی خلاف ورزیوں اور مظالم کو مدنظر رکھتے ہوئے یہ فیصلہ نہایت اہم ہے۔
واضح رہے کہ وینزویلا نے 2006 میں رام اللہ میں فلسطینی اتھارٹی میں اپنا نمائندہ دفتر کھولا تھا۔
