ونزوئلا نے آٹھ ملین نیم فوجی رضاکار امریکہ کے مقابلے کے لیے تیار کر لیے

ونزوئلا نے آٹھ ملین نیم فوجی رضاکار امریکہ کے مقابلے کے لیے تیار کر لیے

 ونزوئلا کے صدر نیکولاس مادورو نے اعلان کیا ہے کہ ملک کے دفاعی ڈھانچے کو مضبوط بنانے اور امریکہ کی بڑھتی ہوئی فوجی موجودگی کے مقابلے کے لیے آٹھ ملین نیم فوجی رضاکاروں کو متحرک کیا جا رہا ہے۔

ترک خبر رساں ایجنسی اناطولیہ کے مطابق، مادورو نے کہا کہ یہ اقدام اس لیے اٹھایا گیا ہے کیونکہ امریکہ حالیہ ہفتوں میں کیریبین خطے میں اپنی فوجی سرگرمیوں میں اضافہ کر رہا ہے۔

ان کے بقول، پہلی بار ملک بھر میں ۱۵ ہزار ۷۵۱ عوامی دفاعی اڈے اور ۵۳۳۶ نیم فوجی یونٹس کو فعال کیا جائے گا۔ اب تک تقریباً ۴.۵ ملین شہری فوجی تربیت حاصل کر چکے ہیں اور نئی بھرتیوں کے بعد یہ تعداد آٹھ ملین سے زائد ہو جائے گی۔

مادورو نے زور دے کر کہا کہ ونزوئلا ہر حال میں امن قائم رکھنے اور بیرونی خطرات کے خلاف اپنے دفاع کی صلاحیت رکھتا ہے۔ عوام کی بہادری کو دنیا بھر میں سراہا جاتا ہے۔ ہم شمالی طاقتوں کی انتہا پسند اور نازی سوچ کا سامنا کر رہے ہیں جو جنوبی امریکہ اور کیریبین کے امن کے لیے خطرہ ہیں۔

ادھر اطلاعات کے مطابق امریکہ نے حالیہ دنوں میں متعدد جنگی بحری جہاز اور ایک ایٹمی آبدوز ونزوئلا کے قریب تعینات کی ہے، جس کے نتیجے میں خطے میں ۴۵۰۰ سے زائد امریکی فوجی موجود ہیں۔

امریکی وزیر دفاع پیٹر ہگست نے فاکس نیوز سے گفتگو میں ونزوئلا کے چین کے ساتھ قریبی تعلقات پر تنقید کرتے ہوئے دعویٰ کیا کہ مادورو ایک منشیات فروش ریاست کے سربراہ ہیں اور انہیں اقتدار چھوڑنے کے فیصلے کرنے ہوں گے، کیونکہ امریکہ اور اس کی فوج ہر طرح سے تیار ہے۔

سابق امریکی صدر ڈونلڈ ٹرمپ بھی بارہا مادورو کو ہدفِ تنقید بنا چکے ہیں اور گزشتہ ماہ ان کی گرفتاری کی مخبری پر انعام بڑھا کر ۵۰ ملین ڈالر کر دیا تھا۔ ٹرمپ نے رواں ہفتے ایک ویڈیو بھی جاری کی جس میں مبینہ طور پر ڈرون کے ذریعے ایک تیز رفتار کشتی کو تباہ کرتے دکھایا گیا۔ونزوئلا کی حکومت کا کہنا ہے کہ ملک میں سرگرم بدنام زمانہ گروہ ٹرن دے آراگوا کو ۲۰۲۳ میں ایک جیل آپریشن کے دوران ختم کر دیا گیا تھا اور اب وہ فعال نہیں ہے۔