وزارتِ عظمیٰ کے لیے کسی امیدوار کی حمایت نہیں کریں گے:عراقی سپریم جوڈیشل کونسل

?️ 27 نومبر 2025

وزارتِ عظمیٰ کے لیے کسی امیدوار کی حمایت نہیں کریں گے:عراقی سپریم جوڈیشل کونسل

عراق کی سپریم جوڈیشل کونسل نے ایک بار پھر سیاسی جماعتوں اور پارلیمانی بلاکس پر زور دیا ہے کہ وہ پارلیمنٹ کے اجلاس اور نئی کابینہ کی تشکیل کے لیے آئینی ٹائم لائن کی سختی سے پابندی کریں۔ کونسل نے واضح الفاظ میں کہا ہے کہ وہ وزارتِ عظمیٰ کے عہدے کے لیے کسی بھی سیاسی، انتظامی یا عدالتی شخصیت کی حمایت نہیں کرتی۔

عراقی روزنامہ الشروق کے مطابق کونسل کا اجلاس جمعرات کو صدرِ کونسل فائق زیدان کی سربراہی میں منعقد ہوا، جس کے بعد جاری بیان میں کہا گیا کہ عدلیہ کو سیاسی مذاکرات، خاص طور پر نئے وزیرِ اعظم کے انتخاب کے معاملے میں گھسیٹنا ناقابلِ قبول ہے۔ بیان میں مزید کہا گیا کہ عدلیہ کا اس عمل سے کوئی تعلق نہیں اور نہ ہی اسے سیاسی فیصلوں یا عہدوں کی تقسیم میں شامل کیا جانا چاہیے۔

دوسری جانب عراق کی مختلف سیاسی جماعتیں اور پارلیمانی اتحاد 11 نومبر کے پارلیمانی انتخابات کے بعد حکومت سازی کے لیے مسلسل مشاورت میں مصروف ہیں۔ الیکشن کمیشن کو انتخابی نتائج پر 872 شکایات موصول ہوئی ہیں جن پر ابتدائی جانچ جاری ہے، جبکہ الیکشن کمیشن کے ماتحت عدالتی بورڈ کو آئندہ دو ہفتوں میں ان شکایات پر حتمی فیصلے دینے ہیں۔

تازہ ترین انتخابی نتائج کے مطابق شیعہ جماعتوں نے پارلیمنٹ میں اکثریت حاصل کر لی ہے، اور فریم ورک الائنس بطور ’’سب سے بڑا پارلیمانی بلاک‘‘ نئے وزیرِ اعظم کے انتخاب کے لیے مشاورت کر رہا ہے۔ اتحاد اس کوشش میں ہے کہ ایک متفقہ فیصلہ کیا جائے جو بلاک کی وحدت برقرار رکھے اور بیرونی مداخلت کو کم سے کم کرے۔

اسی دوران مزاحمتی گروہوں کی پارلیمنٹ میں مضبوط موجودگی بھی امریکی دباؤ کے سامنے ایک بڑی رکاوٹ سمجھی جا رہی ہے۔ مختلف عراقی مزاحمتی گروہوں نے مجموعی طور پر 25 سے زائد نشستیں حاصل کی ہیں، جن میں صرف کتائب حزب اللہ کے پاس 7 نشستیں ہیں، جو نئے سیاسی توازن میں اہم کردار ادا کریں گی۔

سپریم جوڈیشل کونسل کے تازہ مؤقف نے واضح کر دیا ہے کہ حکومت سازی مکمل طور پر سیاسی جماعتوں کی ذمہ داری ہے اور عدلیہ اس عمل سے خود کو دور رکھے گی۔