شام کے ساتھ امن معاہدے کا کوئی امکان نظر نہیں آتا:صہیونی وزیر جنگ

?️ 27 نومبر 2025

 شام کے ساتھ امن معاہدے کا کوئی امکان نظر نہیں آتا:صہیونی وزیر جنگ

 اسرائیلی وزیر جنگ یسرائیل کاتس نے اعتراف کیا ہے کہ اسرائیل شام کے ساتھ امن کی سمت کسی درست راستے پر نہیں بڑھ رہا۔ روسیا الیوم کے مطابق، کنسٹ کی خارجہ و سکیورٹی کمیٹی کے ایک خفیہ اجلاس میں کاتس نے دعویٰ کیا کہ شام کے اندر موجود کچھ گروہ بلندیِ جولان میں رہائشی علاقوں پر زمینی حملے کی منصوبہ بندی کر رہے ہیں۔

کاتس نے کہا کہ شمالی سرحد سے درپیش خطرات کے باعث اسرائیل نے ممکنہ حملے کے مختلف دفاعی منظرناموں پر غور کیا ہے۔ انہوں نے یہ بھی کہا کہ اسرائیل خود کو شام میں دروزی برادری کا محافظ سمجھتا ہے اور اگر السویدا کے علاقے میں حملے دوبارہ ہوئے تو اسرائیل سرحد بند کرنے سمیت مختلف اقدامات کر سکتا ہے۔

یہ بیان اس پس منظر میں سامنے آیا ہے جب گزشتہ ہفتے بنیامین نیتن یاہو، یسرائیل کاتس، وزیر خارجہ گدعون ساعر اور دیگر سینیئر عسکری و انٹیلی جنس حکام نے شام کے اندر اُس علاقے کا دورہ کیا تھا جسے وہ “محافظتی زون” قرار دیتے ہیں۔

عبری میڈیا کے مطابق، شام اور اسرائیل کے درمیان مجوزہ سکیورٹی معاہدے پر مذاکرات مکمل طور پر تعطل کا شکار ہیں۔ شام کے عبوری صدر احمد الشرع نے اسرائیل سے اُن تمام علاقوں سے مکمل انخلا کا مطالبہ کیا ہے جو بشار الاسد حکومت کے زوال کے بعد اسرائیل نے قبضے میں لیے تھے، مگر تل ابیب نے یہ مطالبہ مسترد کر دیا ہے۔

اسرائیلی ذرائع کے مطابق، تل ابیب اس وقت تک کسی انخلا پر تیار نہیں جب تک شام کے ساتھ ایک جامع امن معاہدہ نہ ہو جائے، جو موجودہ حالات میں ممکن دکھائی نہیں دیتا۔

شام میں بشار الاسد حکومت کے خاتمے کے بعد سے دروزی برادری اور ابومحمد الجولانی کے زیرِ اثر گروہوں کے درمیان کشیدگی جاری ہے۔ اس دوران اسرائیل مسلسل شام کے فوجی ٹھکانوں کو نشانہ بناتا رہا ہے اور مقامی اقلیتوں کی حمایت کے نام پر ملک کو مزید تقسیم کرنے کی کوشش کر رہا ہے۔