نیتن یاہو کا جولانی کے ساتھ مذاکرات کے لیے امریکی ثالثی کا مطالبہ 

ایک امریکی ویب سائٹ نے انکشاف کیا ہے کہ بنیامین نیتن یاہو  نے اسرائیلی ریاست اور جولانی ریاست کے درمیان تعلقات کی معمول سازی کے لیے امریکی ثالثی کا مطالبہ کیا ہے۔

صہیونی ذرائع نے امریکی ویب پورٹل آکسیوس کو بتایا کہ اسرائیلی وزیراعظم بنیامین نیتن یاہو  نے امریکہ کے شام میں خصوصی ایلچی ٹام باراک کو بتایا ہے کہ وہ ابو محمد جولانی کی قیادت میں شام کی نئی حکومت کے ساتھ امریکی ثالثی میں مذاکرات کا آغاز کرنا چاہتے ہیں۔

ذرائع کے مطابق، نیتن یاہو  شام کے ساتھ ایک سیکیورٹی معاہدے پر پہنچنے کے خواہشمند ہیں تاکہ دونوں فریقوں کے درمیان جامع مفاہمت کی راہ ہموار ہو سکے۔ رپورٹ کے مطابق، نیتن یاہو  نے خطے میں ہونے والے کئی واقعات کو اپنے فائدے کے لیے استعمال کیا ہے، جن میں سعودی عرب میں ڈونلڈ ٹرمپ اور جولانی کے درمیان ملاقات اور واشنگٹن کا شام پر سے پابندیاں اٹھانے کا فیصلہ شامل ہیں۔

صہیونی اہلکار نے دعویٰ کیا کہ جولانی براہ راست انقرہ سے ہدایات نہیں لیتا اور اس نے واشنگٹن اور ریاض کے ساتھ مضبوط تعلقات استوار کرنے کی خواہش کا اظہار کیا ہے۔ اسرائیلی ریاست اس رویے کو شام کی نئی حکومت کے ساتھ تعلقات کی معمول سازی کے لیے ایک ڈپلومیٹک موقع سمجھ رہی ہے۔

اس سے قبل، امریکی کانگریس کی رکن مارلین اسٹیٹسمین نے انکشاف کیا تھا کہ شام پر قابض دہشت گرد گروپ کے سربراہ ابو محمد جولانی نے اسرائیل کے ساتھ امن قائم کرنے اور گولان کی پہاڑیوں کے معاملے پر مذاکرات کی شرط پر اپنی آمادگی کا اظہار کیا ہے، بشرطیکہ شام کی وحدت محفوظ رہے۔

انہوں نے کہا کہ انہوں نے جولانی سے بات چیت کی ہے، جس میں اسرائیل کے ساتھ تنازعات کے سیاسی حل پر زور دیا گیا، بشمول مقبوضہ گولان پہاڑیوں کا معاملہ۔

یہ تمام تر صورتحال اس وقت سامنے آئی ہے جبکہ بشار الاسد کی حکومت کے خاتمے کے بعد سے اسرائیلی ریاست نے شام کے مختلف علاقوں پر سیکڑوں بار بمباری کی اور ملک کے جنوبی حصے کو وسیع پیمانے پر قبضے میں لے لیا، لیکن صہیونی ریاست کی ان جارحیتوں کا جولانی کی دہشت گرد حکومت کی جانب سے کوئی سخت ردعمل سامنے نہیں آیا۔