نیتن یاہو پر انتخابات مؤخر کرنے کا الزام

نیتن یاہو پر انتخابات مؤخر کرنے کا الزام

اسرائیل کے سابق وزیراعظم نفتالی بینیٹ نے انکشاف کیا ہے کہ موجودہ وزیراعظم بنیامین نیتن یاہو اپنی کابینہ کے ذریعے ملکی اداروں، خاص طور پر سیکیورٹی اداروں پر دباؤ ڈال رہے ہیں تاکہ آئندہ ہونے والے انتخابات کو مؤخر کیا جا سکے۔

 اسرائیلی ٹی وی چینل 13 نے رپورٹ کیا کہ بینیٹ نے اتوار کی صبح ایک خط میں ادارہ برائے داخلی خدمات و نفاذ قانون کے حکام کو مخاطب کرتے ہوئے کہا کہ نیتن یاہو اور ان کے ساتھی جان بوجھ کر الیکشن ملتوی کرانے یا انتخابی عمل کو متاثر کرنے کی کوشش کر رہے ہیں۔

بینیٹ نے اپنے خط میں نیتن یاہو کو شدید تنقید کا نشانہ بناتے ہوئے واضح کیا کہ انتخابات کو مؤخر کرنے کے لیے کنیست کے کم از کم دو تہائی کی منظوری ضروری ہے، جبکہ اس وقت ایسی حمایت دستیاب نہیں ہے۔

انہوں نے مزید کہا کہ سیکیورٹی اداروں کے سربراہان، سرکاری ملازمین، جج حضرات اور الیکشن کمیٹی کے ارکان سیاسی دباؤ کے باوجود صرف قانون کے مطابق عمل کریں۔ ان کے بقول، میں جانتا ہوں کہ آپ پر سخت دباؤ ہے، یہ آسان نہیں، لیکن قانون کو پامال نہ کریں اور نہ ہی خوف زدہ ہوں، کیونکہ جلد ہی ایک نئی حکومت آنے والی ہے۔

یاد رہے کہ ہفتے کے روز اپوزیشن جماعتوں کے رہنماؤں نے پانچ ماہ بعد پہلی بار ملاقات کی تھی تاکہ نیتن یاہو کی کابینہ کے متبادل منصوبے پر بات چیت کی جا سکے۔ تاہم اس اجلاس میں بنی گانتس اور بینیٹ خود شریک نہیں ہوئے، جبکہ عرب جماعتوں کے رہنماؤں کو بھی مدعو نہیں کیا گیا تھا۔