نستلے نے اسرائیلی پابندیوں کی وجہ سے 16 ہزار ملازمین کو فارغ کردیا

نستلے نے اسرائیلی پابندیوں کی وجہ سے 16 ہزار ملازمین کو فارغ کردیا

بین الاقوامی میڈیا رپورٹس کے مطابق، سوئس فوڈ انڈسٹری کی معروف کمپنی نستلے  نے اعلان کیا ہے کہ وہ دنیا بھر میں اپنے 16 ہزار ملازمین کو دو سال کے اندر فارغ کرے گی۔ یہ فیصلہ کمپنی کی فروخت میں نمایاں کمی کے بعد کیا گیا ہے، جو کہ اسرائیلی مصنوعات کے بائیکاٹ کی بڑھتی ہوئی مہم کے نتیجے میں سامنے آیا ہے۔

نستلے نے ایک بیان میں کہا کہ بائیکاٹ مہموں کی وجہ سے کمپنی کی آمدنی میں نمایاں کمی ہوئی ہے، اور اب وہ اپنے اخراجات کو کم کرنے کے لیے اقدامات کر رہی ہے۔ کمپنی کے مطابق، اگلے سال تک 3 ارب سوئس فرانک کی لاگت میں کمی کا منصوبہ بھی شامل ہے۔

نستلے کمپنی اسرائیلی فوڈ کمپنی اوسیم  کی نصف سے زائد حصص کی مالک ہے، جو کہ اسرائیل کی سب سے بڑی فوڈ کمپنیوں میں شمار ہوتی ہے۔ اوسیم کے ساتھ کاروباری تعلق کی وجہ سے نستلے کو دنیا بھر میں مسلمانوں اور انسانی حقوق کے کارکنان کی جانب سے شدید تنقید اور بائیکاٹ کا سامنا ہے۔

گزشتہ دو سال سے جاری غزہ پر اسرائیلی حملوں اور انسانی حقوق کی سنگین خلاف ورزیوں کے بعد، دنیا کے مختلف ممالک بشمول یورپ، امریکہ اور مسلم دنیا  میں اسرائیلی مصنوعات کے بائیکاٹ کی مہم تیزی سے پھیل رہی ہے۔

دوسری جانب، اسرائیلی ذرائع ابلاغ کے مطابق، معروف اسرائیلی فوڈ چین شوک  نے واشنگٹن ڈی سی میں اپنی تمام شاخیں بند کر دی ہیں۔ یہ ریستوران ایک دہائی سے زائد عرصے سے فعال تھے اور مشرقِ وسطیٰ کے کھانے جیسے فلافل اور حُمّص پیش کرتے تھے۔

اسرائیلی اخبار ہارٹز (Haaretz) کے مطابق، ثقافتی کارکنوں نے ان ریستورانوں پر الزام لگایا ہے کہ وہ فلسطینی کھانوں کو اسرائیلی ثقافت کے نام پر پیش کر کے "ثقافتی چوری” کے مرتکب ہیں، اور ساتھ ہی اسرائیلی نسلی امتیاز پر مبنی پالیسیوں کے حامی ہیں۔

یہ پیش رفت عالمی سطح پر اس بات کی علامت ہے کہ اسرائیل کے ساتھ وابستہ کمپنیوں اور برانڈز پر عوامی دباؤ اور اقتصادی بائیکاٹ کے اثرات تیزی سے بڑھ رہے ہیں۔