ٹرمپ نےغزہ جنگ بندی کے معاہدے کی نگرانی کے لیے امریکی تاجر کو مقرر کرنے کا فیصلہ

ٹرمپ نےغزہ جنگ بندی کے معاہدے کی نگرانی کے لیے امریکی تاجر کو مقرر کرنے کا فیصلہ

اسرائیلی چینل 12 کی رپورٹ کے مطابق، امریکی صدر ڈونلڈ ٹرمپ نے ایک امریکی-اسرائیلی تاجر مائیکل آیزنبرگ کو غزہ میں جنگ بندی کے معاہدے کی نگرانی کے لیے امریکی گروپ کا سربراہ مقرر کیا ہے۔ آیزنبرگ پہلے بھی غزہ میں انسانی امداد کی تقسیم کے حوالے سے ایک ادارے کے قیام میں شامل تھے، تاہم اس منصوبے میں ناکامی کا سامنا کیا تھا۔

اسرائیلی میڈیا نے مزید اطلاع دی کہ ٹرمپ کے خصوصی نمائندے اسٹیو وٹکاف اور جیرڈ کوچنر نے اسرائیلی وزیراعظم بنیامین نیتن یاہو کو جنگ بندی کی خلاف ورزی کے خطرات سے آگاہ کیا اور کہا کہ جنگ بندی کی خلاف ورزی مکمل طور پر ناقابل قبول ہے۔

اسرائیلی میڈیا کے مطابق، امریکی نمائندوں نے نیتن یاہو کے ساتھ ملاقات میں اس بات پر زور دیا کہ انہیں جنگ بندی کے دوسرے مرحلے کے لیے اپنی کوششیں تیز کرنی ہوں گی۔ اس ملاقات کے دوران، انہوں نے اسرائیلی فوج کے کمانڈرز کے ساتھ بھی بات کی تاکہ دوسرے مرحلے کے معاہدے کی تیاری پر توجہ دی جا سکے۔

اسرائیلی ذرائع نے بتایا کہ امریکی نمائندے 15 اکتوبر کو اسرائیل پہنچے اور نیتن یاہو سے ملاقات کی، جس میں غزہ کے اسیران کے تبادلے اور ان کی لاشوں کی واپسی جیسے معاملات پر تبادلہ خیال کیا گیا۔

علاوہ ازیں، فلسطینی ذرائع نے بتایا کہ جنگ بندی کے دوسرے مرحلے کے مذاکرات میں مشکلات آ رہی ہیں، خاص طور پر اسرائیل کی طرف سے اسیران کی لاشوں کی واپسی کے مطالبات اور دیگر شرائط پر اعتراضات سامنے آئے ہیں۔ فلسطینی گروپوں نے امریکی حکومت سے درخواست کی ہے کہ وہ اسرائیل کو معاہدے کی مکمل پابندی کرنے پر مجبور کرے۔

یہ معاہدہ جو مصر کے شہر شرم الشیخ میں طے پایا تھا، غزہ کی مستقبل کی انتظامیہ، مزاحمتی گروپوں کے ہتھیاروں اور علاقے کے انتظام پر گفتگو کے لیے دوسرے مرحلے کے مذاکرات پر زور دیتا ہے۔ حماس نے جنگ بندی کے پہلے مرحلے کے مکمل نفاذ کا مطالبہ کیا ہے، جس میں امدادی سامان کی ترسیل، سڑکوں کی بحالی، تعمیراتی سامان کی فراہمی اور دیگر انسانی امداد شامل ہے۔

حماس نے 17 اکتوبر 2024 کو غزہ میں جنگ کے اختتام اور اسیران کے تبادلے کے معاہدے کی رسمی طور پر تصدیق کی تھی۔ اسرائیلی فوج نے 18 اکتوبر 2024 کو جنگ بندی کے نفاذ کا اعلان کیا تھا، جس کے مطابق اسرائیلی افواج غزہ کے کچھ علاقوں میں اپنی موجودگی برقرار رکھیں گی، اور جنوبی اور شمالی غزہ کے درمیان آمدورفت مخصوص سڑکوں پر جاری رہے گا۔تاہم، اسرائیل کی طرف سے جنگ بندی کے ابتدائی مرحلے میں مسلسل رکاوٹیں اور معاہدے کی خلاف ورزیاں جاری ہیں۔