میدویدیف کی یورپی یونین کے سربراہی اجلاس میں روسی اثاثوں پر تنقید 

سچ خبریں: روسی سیکورٹی کونسل کے نائب سربراہ دیمیتری میدویدیف نے روسی اثاثوں کے حوالے سے یورپی یونین کے سربراہان کانفرنس کو چوروں کی میٹنگ قرار دے دیا ہے۔

انہوں نے کہا کہ یورپ روسی اثاثوں کو ہڑپ کرنے کے اپنے منصوبوں سے دستبردار نہیں ہوا ہے، لیکن اس معاملے پر عارضی طور پر خاموشی اختیار کرلی ہے۔

دوسری جانب، ولادیمیر پوٹن کے خصوصی ایلچی برائے سرمایہ کاری اور اقتصادی تعاون، کریل دیمیتریف نے جمعہ کے روز کہا کہ قانون اور عقل نے فتح پائی ہے۔ ان کا یہ بیان اس وقت سامنے آیا جب یورپی یونین کے رہنماؤں نے یوکرین کی مالی معاونت کے لیے روس کے منجمد اثاثوں کو استعمال کرنے کے بجائے قرض لینے کا فیصلہ کیا۔

دیمیتریف نے سوشل میڈیا پلیٹ فارم ایکس پر لکھا کہ ارسولا فون ڈیر لین کی قیادت میں یورپی یونین کے جنگ جوؤں کو زبردست دھچکا لگا ہے – یورپی یونین میں معقول آوازوں نے یوکرین کی مالی امداد کے لیے روسی اثاثوں کے غیرقانونی استعمال پر پابندی عائد کردی ہے۔

یورپی یونین کے رہنماؤں نے جمعہ کے روز یوکرین کو 90 ارب یورو کا قرضہ دینے پر اتفاق کیا ہے تاکہ اس کے قریب الوقوع بجٹ خسارے کو پورا کیا جاسکے، تاہم اس رقم کی فراہمی کے لیے روس کے منجمد اثاثوں کے استعمال پر کوئی معاہدہ نہیں ہوسکا۔