میانمار میں 30 افراد کی جلی کٹی لاشیں برآمد

?️ 26 دسمبر 2021

سچ خبریں:میانمار میں کچھ گاڑیوں کے اندر تیس افراد کی جلی ہوئی لاشیں ملی ہیں جن میں خواتین اور بچے بھی شامل ہیں۔
اے ایف پی کی رپورٹ کے مطابق میانمارمیں بچوں اور خواتین سمیت 30 افراد کی جلی ہوئی لاشیں ملی ہیں جنہیں گاڑیوں کے اندر ہی نذر آتش کردیا گیا،رپورٹ کے مطابق یہ واقعہ میانمار کی ریاست کیاہ میں پیش آیا جس کے بارے میں خیال کیا جارہا ہے کہ مذکورہ واقعے میں میانمار کی فوج ملوث ہے،تاہم سوشل میڈیا پر وائرل ہونے والی تصاویر میں نذر آتش کیے گئے دو ٹرکوں اور ایک کار کو دیکھا جا سکتا ہے جن کے اندر بچوں اور خواتین کی جلی ہوئی لاشیں ملی ہیں۔

واضح رہے کہ ایک شخص نے نام ظاہر نہ کرنے کی شرط پر بتایا کہ جب ہم آج صبح علاقے میں پہنچے تو ہمیں دو ٹرکوں میں 27 جلی ہوئی لاشیں ملیں جبکہ ایک اور عینی شاہد نے بتایا کہ ہمیں 27 کھوپڑیاں ملی ہیں جبکہ ٹرک کے اندر مزید لاشیں بھی تھیں جنہیں جلا کر ٹکڑے ٹکڑے کر دیا گیا تھا اس لیے ہم ان کی گنتی نہیں کر سکے۔

اس حوالے سے میانمار میں ایک مانیٹر گروپ نے بتایا کہ اس نے مقامی میڈیا رپورٹس اور مقامی جنگجوؤں سے تصدیق کی ہے کہ فوج نے ہپرسو ٹاؤن شپ میں بچوں اور خواتین سمیت 35 افراد کو جلا کر ہلاک کیا،یادرہے کہ میانمار کی فوج نے حال ہی میں حکومت کا تختہ الٹ کر قبضہ کرلیا تھا جس کے بعد سے آمریت مخالف عوام پر مختلف کریک ڈاؤن میں اب تک ایک ہزار 300 افراد ہلاک ہوچکے ہیں۔