ممکن ہے ترکی اسرائیل کا اگلا نشانہ ہو:اسرائیلی میڈیا

ممکن ہے ترکی اسرائیل کا اگلا نشانہ ہو:اسرائیلی میڈیا

ایک صیہونی روزنامے نے خبردار کیا ہے کہ قطر پر اسرائیلی فضائی حملے کے بعد اب ترکیہ تل ابیب کا اگلا ہدف بن سکتا ہے، اور اگر ایسا ہوا تو یہ اقدام پورے خطے کو ایک بڑے بحران میں دھکیل دے گا۔

روسیا الیوم کے مطابق، روزنامہ ہارٹص نے اپنی رپورٹ میں لکھا ہے کہ دوحہ میں اسرائیلی حملے کے نتیجے میں حماس کے رہنما خلیل الحیہ کے بیٹے سمیت چھ افراد جاں بحق ہوئے، جس کے بعد امکان بڑھ گیا ہے کہ اسرائیل آئندہ ترکیہ میں حماس کے دفاتر کو نشانہ بنائے۔

رپورٹ میں اسرائیلی خفیہ ادارے شاباک کی اس خبر کا حوالہ بھی دیا گیا ہے جس میں دعویٰ کیا گیا تھا کہ ترکیہ میں حماس کا ایک سیل وزیر انتہا پسند ایتامار بن گویر کے قتل کی منصوبہ بندی کر رہا تھا۔ اگرچہ انقرہ نے کسی بھی قسم کی شمولیت کو فوراً مسترد کر دیا، لیکن صیہونی حکام ترکیہ کے خلاف براہِ راست حملوں کی تیاری کر سکتے ہیں۔

ہارٹص نے قطر اور ترکیہ کے فرق کو بنیادی قرار دیتے ہوئے لکھا کہ ترکیہ نیٹو کی دوسری بڑی فوج رکھتا ہے، شام، لیبیا اور مشرقی بحیرہ روم میں اثر و رسوخ رکھتا ہے اور نیٹو کا رکن ہے۔ اس لیے انقرہ کے ساتھ محاذ آرائی ایک محدود تنازعے کو وسیع علاقائی بحران میں بدل دے گی اور اسرائیل کے لیے مغربی حمایت بھی کھو دینے کا خطرہ پیدا ہو جائے گا۔

صدر رجب طیب اردوغان پہلے ہی دوحہ پر حملے کو بین الاقوامی قوانین کی کھلی خلاف ورزی قرار دے چکے ہیں اور فلسطینی عوام کی حمایت پر زور دیا ہے۔

اسی دوران ٹائمز آف اسرائیل نے بھی انکشاف کیا کہ تل ابیب نے ماضی میں نیٹو کے خدشات کے باعث ترکیہ میں کارروائی کو مؤخر کیا اور اس کی بجائے قطر کو ہدف بنایا۔ لیکن بڑھتے ہوئے اندرونی دباؤ کے تحت وزیراعظم بنیامین نتانیاہو اب انقرہ کے ساتھ براہِ راست ٹکراؤ کا رسک لے سکتے ہیں۔

نتانیاہو نے دوحہ میں ناکامی کے بعد ایک ویڈیو پیغام میں واضح کیا تھا کہ اسرائیل ان تمام ممالک میں حماس کے رہنماؤں کو نشانہ بنائے گا جہاں وہ موجود ہیں۔