سچ خبریں:برطانیہ کے معروف گلوکار ڈچ ویلی نے اسلامی تعلیمات سے متأثر ہو کر کلمہ شہادت پڑھا اور مسلمان ہونے کا اعلان کیا۔
معروف برطانوی ریپر اور گلوکار ڈچ ویلی نے اسلامی تعلیمات سے متاثر ہوکر اسلام قبول کرلیا، باقاعدہ کلمہ شہادت پڑھ کر دائرہ اسلام میں داخل ہوگئے جس کی ویڈیو بھی سوشل میڈیا پر وائرل ہوگئی۔
سماجی رابطے کی ویب سائٹ ٹوئٹر پر شیئر کی گئی ایک وائرل ویڈیو میں دیکھا جاسکتا ہے کہ وہ ایک عالم دین کے سامنے اسلام قبول کررہے ہیں اور دائرہ اسلام میں داخل ہونے کے لیے کلمہ شہادت پڑھ رہے ہیں۔
بین الاقوامی ذرائع ابلاغ کی رپورٹ کے مطابق ڈچ ویلی نے اب اپنے انسٹاگرام اکاؤنٹ پر بذریعہ اسٹوری سوشل میڈیا پر وائرل ہونے والی ویڈیوز کی تصدیق بھی کی ہے، یاد رہے کہ اسلام قبول کرنے سے قبل انہوں اسلامی تعلیمات کا بغور مطالعہ کیا اور دین حق کی سچائی اور تعلیمات کو تسلیم کرتے ہوئے اپنی زندگی اسلام کے مطابق گزارنے کا فیصلہ کیا۔
خیال رہے کہ اس سے قبل بھی گلوکار کی اسلامی تعلیمات سے متاثر ہوکر قرآن اور دیگر مقدس کتابوں کا باقاعدہ مطالعہ کرنے کے حوالے سے بھی خبریں گردش کرتی رہیں تھیں، تاہم ڈچ ویلی نے اس وقت اس حوالے سے باقاعدہ کوئی تصدیق یا تردید نہیں کی تھی۔
