متحدہ عرب امارات کے وزیر خارجہ کا پہلی بار تل ابیب کا دورہ

?️ 15 ستمبر 2022

سچ خبریں:متحدہ عرب امارات کے وزیر خارجہ عبداللہ بن زائد آل نہیان بدھ کی شام پہلی بار سرکاری دورے پر تل ابیب پہنچے۔

متحدہ عرب امارات کی سرکاری خبر رساں ایجنس وام کی رپورٹ کے مطابق متحدہ عرب امارات کے وزیر خارجہ عبداللہ بن زاید آل نہیان نے ایک اعلیٰ اقتصادی وفد کے ساتھ اس ملک اور صیہونی حکومت کے درمیان تعلقات کو معمول پر لانے کی دوسری سالگرہ کے موقع پر مقبوضہ علاقوں کا دورہ کیا۔

واضح رہے کہ اس دورے کے دوران متحدہ عرب امارات کے وزیر خارجہ صیہونی حکومت کے حکام سے ملاقات کریں گے اور دونوں فریقوں کی تشویش اور دوطرفہ تعلقات نیز مشترکہ تعاون کے امکانات سے متعلق معاملات کا جائزہ لیں گے۔

یاد رہے کہ ستمبر 2020 میں صیہونی حکومت نے اس وقت کے امریکی صدر ڈونلڈ ٹرمپ کی موجودگی میں واشنگٹن میں متحدہ عرب امارات اور بحرین کے ساتھ اپنے تعلقات کو معمول پر لانے کے لیے ایک معاہدے پر دستخط کیے تھے جس کے بعد سے متحدہ عرب امارات اور بحرین نے فلسطینی عوام کے حقوق کو پیروں تلے روندتے ہوئے اور امت مسلمہ کی پیٹھ میں چھرا گھونپ پر صیہونی ریاست کے ساتھ ہوائی سفر، سیاحت، تجارت اور کھیلوں کے متعدد معاہدوں پر دستخط کیے ہیں جبکہ ان ممالک کے اپنی حکومتوں کے ان اقدامات سے سخت ناراض ہیں اور اس کے خلاف متعدد مظاہرے بھی ہوچکے ہیں۔