متحدہ عرب امارات نے انسانی امداد کے بجائے سوڈان کو کیا دیا؟

?️ 12 اگست 2023

سچ خبریں: ایک امریکی اخبار نے لکھا ہے کہ متحدہ عرب امارات نے خانہ جنگی کے شکار ملک سوڈان کو انسانی ہمدردی کی بنیاد پر امداد بھیجنے کے بجائے ہتھیار بھیجے ہیں۔

المیادین چینل کی رپورٹ کے مطابق امریکی اخبار وال اسٹریٹ جرنل نے اپنی ایک رپورٹ میں لکھا ہے کہ امریکہ کے اتحادی متحدہ عرب امارات نے سوڈان کو انسانی امداد بھیجنے کا وعدہ کیا تھا لیکن اس کے بجائے اس نے اس ملک کو ہتھیار بھیجے ہیں۔

یہ بھی پڑھیں: سوڈان میں حالات کو پرسکون کرنے اور تنازعات کو روکنے پر ریاض کا زور

اس رپورٹ کے مطابق متحدہ عرب امارات سوڈان کو ہتھیار بھیج کر سوڈان میں تنازعات کو مزید بھڑکا رہا ہے جس میں 3900 سے زائد افراد ہلاک ہو چکے ہیں۔

یوگنڈا کے حکام نے اعلان کیا ہے کہ ایک اماراتی طیارہ یوگنڈا میں اترا جس میں گولہ بارود اور ہتھیاروں سے بھرے درجنوں بکس تھے،یوگنڈا کے حکام کے مطابق یہ طیارہ سوڈان کو انسانی امداد پہنچانے والا تھا۔

وال اسٹریٹ جرنل کی رپورٹ کے مطابق یہ ہتھیار 2 جون کو دریافت ہوئے ،اس طرح متحدہ عرب امارات سوڈانی فوج کے خلاف ریپڈ ایکشن ملیشیا کے کمانڈر محمد حمدان دقلو کی حمایت کرنے کی کوشش کر رہا ہے۔

یاد رہے کہ متحدہ عرب امارات دقلو کی حمایت کرتا ہے کیونکہ وہ اس سے سوڈان میں ملکی مفادات کا تحفظ کرنے کی توقع رکھتا ہے، اس لیے کہ سوڈان کی بحیرہ احمر میں ایک حساس جغرافیائی سیاسی حیثیت ہے اور اس کی سونے کی بڑی کانوں کے ساتھ دریائے نیل تک رسائی ہے۔

دریں اثنا متحدہ عرب امارات کے حکام نے سوڈان میں تنازعات کے پرامن حل کی ضرورت پر زور دیا ہے اور اس ملک کے عوام کی تکالیف کو کم کرنے کی کوششوں کی حمایت کی ہے۔

وال سٹریٹ جرنل نے مزید لکھا ہے کہ امریکی صدر جو بائیڈن کی انتظامیہ کو ان اماراتی ہتھیاروں کو سوڈان بھیجنے کی اطلاع تھی اور انہوں نے ابوظہبی کے اس اقدام پر تشویش کا اظہار کیا۔

مزید پڑھیں: سوڈان میں بغاوت کی مبہم صورتحال؛ تنازعات کا خاتمہ یا کشیدگی ؟

یاد رہے کہ اس سے قبل اقوام متحدہ کے ڈپٹی سکریٹری جنرل نے سوڈان میں انسانی صورت حال کی خرابی کے بارے میں خبردار کیا تھا۔ انہوں نے اس بات پر زور دیا کہ سوڈان تنازعے میں شامل فریقین کے درمیان کوئی قابل ذکر کامیابیاں حاصل نہیں ہوئی ہیں۔