قطری وزیرِ خارجہ کے دورۂ تہران میں خطے میں کشیدگی کم کرنے پر زور

 قطر کی وزارتِ خارجہ نے اعلان کیا ہے کہ ملک کے وزیرِ اعظم اور وزیرِ خارجہ شیخ محمد بن عبدالرحمن آل ثانی نے تہران کے دورے کے دوران اسلامی جمہوریہ ایران کی قومی سلامتی کونسل کے سیکریٹری علی لاریجانی سے ملاقات میں خطے میں کشیدگی میں کمی، علاقائی تعاون کے فروغ اور پرامن حل کی حمایت پر زور دیا۔

اتوار کی صبح قطری وزیرِ اعظم و وزیرِ خارجہ نے ہفتے کے روز تہران کا دورہ کیا، جہاں انہوں نے علی لاریجانی سے ملاقات کر کے مشرقِ وسطیٰ کی تازہ ترین علاقائی صورتحال پر تفصیلی تبادلۂ خیال کیا۔

بیان کے مطابق یہ ملاقات خطے میں بڑھتی ہوئی کشیدگی کو کم کرنے کے طریقۂ کار پر غور کے لیے منعقد کی گئی، جس میں دونوں فریقوں نے سلامتی اور استحکام کے فروغ کے لیے سفارتی مکالمے اور علاقائی تعاون کو ناگزیر قرار دیا۔

قطر کی وزارتِ خارجہ نے واضح کیا کہ شیخ محمد بن عبدالرحمن آل ثانی نے اس ملاقات میں علاقائی بحرانوں کے پرامن حل کے لیے دوحہ کی بھرپور حمایت کا اعادہ کیا اور کہا کہ مشرقِ وسطیٰ میں پائیدار امن اور استحکام صرف گفت و شنید اور سفارت کاری کے ذریعے ہی ممکن ہے۔

بیان میں اس بات پر بھی زور دیا گیا کہ خطے کے ممالک کو اجتماعی کوششوں اور بین الاقوامی ہم آہنگی کے ذریعے اس امر کو یقینی بنانا چاہیے کہ فوجی اور سکیورٹی تنازعات کے منفی اثرات بے گناہ عوام پر نہ پڑیں۔

قطری وزیرِ اعظم نے مزید کہا کہ برادر اور دوست ممالک کے ساتھ قریبی رابطہ اور سفارتی ذرائع کے ذریعے اختلافات کا حل تلاش کرنا ناگزیر ہے، جبکہ تصادم پر مبنی پالیسیوں سے گریز کیا جانا چاہیے۔