فلسطین کانفرنس میں کن رہنماؤں کے مائیکروفون بند ہوئے؟

فلسطین کانفرنس میں کن رہنماؤں کے مائیکروفون بند ہوئے؟

نیویارک میں منعقدہ فلسطین کے مسئلے کے پرامن حل اور دو ریاستی فارمولے” کے اجلاس کے دوران ترکی اور انڈونیشیا کے صدور کے مائیکروفون مقررہ وقت ختم ہونے پر خودکار نظام کے تحت بند کر دیے گئے۔

رپورٹ کے مطابق مقررین کو پانچ منٹ اور دیگر شرکاء کو تین منٹ کے لیے خطاب کا وقت دیا گیا تھا۔ صدر رجب طیب اردوگان نے اگرچہ وقت سے زیادہ بولنے کی کوشش کی، مگر مائیکروفون بند ہونے کے باوجود اپنی تقریر مکمل کر لی۔ اسی طرح انڈونیشیا کے صدر کا مائیک بھی مقررہ وقت پر بند ہوا۔

ترکی کی صدارتی کمیونیکیشن ڈائریکٹوریٹ نے وضاحت کی کہ ایردوغان کی تقریر دورانِ خطاب وقفوں اور شرکاء کی جانب سے بار بار ہونے والی تالیوں کے باعث طول پکڑ گئی، جس کی وجہ سے نظام کے تحت پانچویں منٹ پر مائیکروفون خود بخود بند ہو گیا۔

ادارے نے واضح کیا کہ اردن کے بادشاہ کی تقریر کسی تکنیکی مسئلے کا شکار نہیں ہوئی اور اس حوالے سے پھیلنے والی افواہیں درست نہیں ہیں۔

یاد رہے کہ یہ اعلیٰ سطحی اجلاس اقوام متحدہ کے ہیڈکوارٹر میں سعودی عرب اور فرانس کی میزبانی میں ہوا، جہاں متعدد رہنماؤں نے فلسطین کو بطور آزاد ریاست تسلیم کرنے کا اعلان کیا اور اسرائیل کی غزہ میں نسل کشی و غیرقانونی بستیاں بسانے کی پالیسیوں کی مذمت کی۔

صدر اردوگان  نے اپنے خطاب میں کہا کہ غزہ میں انسانی المیہ شدت اختیار کر رہا ہے اور اسرائیلی وزیرِاعظم نیتن یاہو فلسطین کے قیام کو ناممکن بنانے کی کوشش کر رہے ہیں۔ ان کے بقول فلسطین کا مسئلہ ایک عالمی مسئلہ ہے اور نیتن یاہو اس وقت اپنے ہمسایوں کے خلاف نسل کشی کر رہے ہیں۔ اسرائیلی جبر کے خلاف کھڑا ہونا اخلاقی ذمہ داری ہے۔