صہیونی  یمن کے سخت جواب کے لیے تیار رہیں:مہدی المشاط

صہیونی  یمن کے سخت جواب کے لیے تیار رہیں:مہدی المشاط

یمن کی اعلیٰ سیاسی کونسل کے صدر مہدی المشاط نے اسرائیلی جارحیت پر سخت ردعمل ظاہر کرتے ہوئے کہا ہے کہ صہیونی حملے ناکام ہو چکے ہیں اور دشمن کو یمن کے بھرپور اور فیصلہ کن جواب کے لیے تیار رہنا چاہیے۔

انہوں نے واضح کیا کہ بےگناہ شہریوں اور رہائشی علاقوں پر وحشیانہ بمباری کے باوجود یہ حملے یمنی عوام کے عزم کو کمزور کرنے کے بجائے مزید مضبوط کریں گے اور یمن اپنے تمام تر وسائل کے ساتھ جواب دے گا۔

دوسری جانب انصاراللہ کے میڈیا ونگ نے ایک بیان میں اسرائیلی حملوں کو جنگی جرائم قرار دیتے ہوئے کہا کہ صنعا اور صوبہ الجوف میں شہری و حیاتیاتی تنصیبات کو نشانہ بنایا گیا ہے۔ بیان میں زور دیا گیا کہ یہ کارروائیاں یمن کو فلسطینی عوام کی حمایت سے باز نہیں رکھ سکتیں۔

انصاراللہ نے اس بات کی بھی مذمت کی کہ صہیونی افواج نے 26 ستمبر نامی سرکاری اخبار کے دفتر کو نشانہ بنایا، جس کا مقصد آزاد اور حق گو میڈیا کو خاموش کرانا تھا۔ تنظیم نے عالمی ذرائع ابلاغ سے اپیل کی کہ وہ یمن میں ہونے والے ان جرائم کو بے نقاب کریں اور صہیونی۔امریکی پروپیگنڈا مشین کا مقابلہ کریں۔

یمنی رہنما عبدالعزیز بن حبتور نے بھی اسرائیلی جارحیت کو ’’وحشیانہ اور بزدلانہ‘‘ قرار دیتے ہوئے کہا کہ اس نے صرف یمنی عوام کی مزاحمتی قوت کو بڑھایا ہے۔ انہوں نے مزید کہا کہ قطر کے دارالحکومت دوحہ میں حماس کے دفتر پر حملہ بھی امریکہ اور اسرائیلی خفیہ اداروں کے گٹھ جوڑ کا نتیجہ ہے۔

انہوں نے عرب ممالک کو خبردار کیا کہ اسرائیل کے ساتھ تعلقات معمول پر لانے یا امریکہ کے سامنے نرم رویہ اختیار کرنے سے بھی کوئی ملک اس کے عزائم سے محفوظ نہیں رہ سکتا۔ ان کے بقول، صہیونی ریاست خطے کی ہر عرب حکومت کو اپنی توسیع پسندانہ پالیسیوں کے دائرے میں گھسیٹنا چاہتی ہے۔

یمنی وزارت صحت کے مطابق اسرائیلی فضائی حملوں میں شہداء کی تعداد بڑھ کر 35 ہو گئی ہے جبکہ 131 افراد زخمی ہوئے ہیں۔ صہیونی طیاروں نے صرف صنعا پر چھ سے زائد حملے کیے، جبکہ صوبہ عمران اور الجوف بھی نشانہ بنے۔