صہیونی فوج نے بچوں کے قتل کو محلِ وقوع کے قریب ہونے کا بہانہ بنایا

صہیونی فوج نے بچوں کے قتل کو محلِ وقوع کے قریب ہونے کا بہانہ بنایا

اسرائیلی فوج نے جنوبی لبنان میں ایک کار پر حملے کے نتیجے میں تین معصوم بچوں سمیت پانچ بے گناہ شہریوں کی شہادت پر افسوس ظاہر کرتے ہوئے اپنی سفاکیت کو یہ کہہ کر جواز فراہم کرنے کی کوشش کی کہ یہ افراد حملے کے مقام کے قریب موجود تھے۔

یہ بیان ایسے وقت میں سامنے آیا ہے جب صہیونی فوج گزشتہ 716 دنوں سے غزہ میں اپنی وحشیانہ کارروائیوں کے دوران قریب 70 ہزار بے گناہ فلسطینیوں کو شہید کر چکی ہے اور تاحال اپنے جرائم سے باز نہیں آئی۔

لبنان کے پارلیمنٹ اسپیکر نبیہ بری نے اس حملے کی شدید مذمت کرتے ہوئے کہا کیا لبنانی بچے اسرائیل کے لیے کوئی وجودی خطرہ تھے کہ انہیں شہید کیا گیا؟ حقیقت یہ ہے کہ خود اسرائیل ہی عالمی امن و سلامتی کے لیے سب سے بڑا خطرہ ہے۔

اسی واقعے پر یونیسف (اقوامِ متحدہ کا ادارہ برائے تحفظ اطفال) نے بھی بیان جاری کرتے ہوئے اسرائیلی جارحیت کو سنگین جرم اور انسانی اصولوں کی صریح خلاف ورزی قرار دیا۔

دوسری جانب حزب اللہ سے وابستہ رکن پارلیمان حسن فضل اللہ نے کہا کہ اقوامِ متحدہ کی نگرانی کمیٹی آتش بس کی خلاف ورزیوں پر خاموش تماشائی بنی ہوئی ہے اور اسرائیل کو کھلی چھوٹ دے رکھی ہے۔

لبنانی وزارتِ صحت کے مطابق، بنت جبیل میں اسرائیلی ڈرون حملے کے نتیجے میں ایک ہی خاندان کے پانچ افراد شہید ہوئے، جن میں تین معصوم بچے بھی شامل تھے۔