صہیونی حکومت کا زوال اللہ کا حتمی وعدہ ہے: عبدالملک الحوثی

سچ خبریں:یمن کی انصار اللہ تحریک کے رہنما سید عبدالملک الحوثی نے کہا ہے کہ صہیونی حکومت کے ظلم و طغیان کا خاتمہ اللہ تعالیٰ کا حتمی وعدہ ہے اور یہ اس کی حکمت اور عدل سے جڑا ہوا ہے۔

 انہوں نے زور دے کر کہا کہ یہ زوال یقینی طور پر واقع ہوگا۔

عالم اسلام کی موجودہ صورت حال پر گفتگو کرتے ہوئے الحوثی نے اسے امت مسلمہ کی اپنی بڑی ذمہ داریوں میں کوتاہی اور دینی وابستگیوں میں شدید کمزوری کا نتیجہ قرار دیا۔

انہوں نے علاقے کی کچھ حکومتوں کی صہیونی حکومت کے ساتھ تعلقات پر شدید تنقید کرتے ہوئے کہا کہ نام نہاد معمول کاری درحقیقت اسرائیلی دشمن کی بالادستی کو تسلیم کرنے اور اس کی پالیسیوں کے سامنے سرتسلیم خم کرنے کے مترادف ہے۔

انصاراللہ کے رہنما کا کہنا تھا کہ صہیونی حکومت کے جرائم اور جارحیت روزِ روشن کی طرح عیاں ہیں، اس کے باوجود کچھ عرب حکومتیں اس حکومت کی بالادستی کو ایک ناگزیر حقیقت کے طور پر پیش کر رہی ہیں اور مقابلہ کرنے کے بجائے اس کے ساتھ مطابقت پیدا کرنے کی بات کر رہی ہیں۔

انہوں نے اس بات پر بھی زور دیا کہ اللہ کے وعدے پر بھروسہ رکھنے کا مطلب سیاسی شعور نہ ہونا نہیں ہے، بلکہ تاریخی روایات اور زمانے کی تبدیلیوں سے بے خبری سطحی سوچ کی علامت ہے۔

سید عبدالملک الحوثی کا کہنا تھا کہ ایسی صورت حال میں جب دشمن مکمل تسلط اور معاشروں کی تباہی پر تلے ہوئے ہو، اس کے ساتھ معمول کاری اور اس کے سامنے ہتھیار ڈالنے کا کوئی جواز نہیں بنتا۔

غزہ کی صورتحال کا ذکر کرتے ہوئے انہوں نے کہا کہ صہیونی حکومت اپنے تسلط کو مضبوط کرنے اور مسلمانوں کی جان، مال اور مقدسات کو حلال قرار دینے کی کوشش کر رہی ہے۔ انہوں نے امت مسلمہ پر زور دیا کہ وہ اللہ کی طرف رجوع کرکے اور اپنی دینی و عملی ذمہ داریوں کو ادا کرتے ہوئے اس الہٰی وعدے کی تکمیل کے لیے اپنا کردار ادا کرے۔

اپنی گفتگو کے ایک اور حصے میں الحوثی نے امریکہ کو صہیونی حکومت کا حامی اور اس کے جرائم میں شریک قرار دیا اور کہا کہ بعض عرب ممالک امریکہ کے پیچھے چل رہے ہیں جو کہ خود صیہونی راستے پر گامزن ہے۔