صومالیہ فوج کے ہاتھوں الشباب تنظیم کے 200 دہشت گرد ہلاک

?️ 11 اکتوبر 2022

سچ خبریں:صومالیہ فوج نے اعلان کیا ہے کہ اس ملک کے فوجی دستوں کی کارروائیوں میں الشباب دہشت گرد گروہ کے 200 عناصر ہلاک ہو گئے ہیں۔

ترکی کی اناطولیہ خبر رساں ایجنسی کی رپورٹ کے مطابق صومالیہ فوج نے اعلان کیا ہے کہ اس کے فوجی دستوں کی کارروائیاں صومالیہ کے مرکز میں ہیران کے علاقے میں کی گئیں، رپورٹ کے مطابق فوج کے یونٹوں نے خانہ بدوش ملیشیا کے تعاون سے ہیران کے علاقے میں واقع گاؤں جائبو میں الشباب کے عناصر کے خلاف پیشگی حملہ کیا اور10 گھنٹے تک جاری رہنے والے اس آپریشن میں الشباب دہشتگروہ کے 200 کے عناصر مارے گئے۔

یاد رہے کہ اس سے قبل صومالیہ حکومت نے اپنے ملک کی فوج کی کارروائی کے دوران دہشت گرد گروہ الشباب کے 30 سے زائد ارکان کی ہلاکت کا اعلان کیا تھا، واضح رہے کہ الشباب ایک مسلح دہشت گرد گروہ ہے جو القاعدہ نیٹ ورک سے وابستہ ہے اور اس کا ہاتھ افریقہ میں سیکڑوں افراد کو ہلاک کرنے والی کئی دہشت گرد کارروائیوں کے پیچھے رہا ہے۔

اس کے علاوہ الشباب نے صومالیہ کے دارالحکومت موغادیشو میں اس ملک کے فوجیوں اور افریقی یونین کی امن فوج پر متعدد بار حملے کیے ہیں نیز افریقہ کے دیگر حصوں میں کئی خونریز کارروائیاں کی ہیں۔