شام کے ایک گاؤں کے رہائشیوں کا امریکی فوجیوں سے مقابلہ

?️ 15 فروری 2022

سچ خبریں:شام کے شہر الحسکہ کے شمالی مضافات میں دیہاتیوں نے مقامی فوجی دستوں کی مدد سے امریکی فوجیوں کے ایک قافلے کو اپنے گاؤں میں داخل ہونے سے روکا اور اسے پسپائی پر مجبور کردیا۔
شام کی سرکاری نیوز ایجنسی سانا کی رپورٹ کے مطابق اس ملک کے شہرالحسکہ کے شمالی مضافات میں واقع گاؤں تل زہاب کے مکینوں نے شامی فوج کی ایک چوکی کی مدد سے امریکی قابضین کے ایک فوجی قافلے کو روک کر اسے پسپائی پر مجبور کردیا۔

گاؤں کے مقامی ذرائع نے بتایا کہ اس قافلے میں چھ امریکی فوجی گاڑیاں اور کرد علیحدگی پسند عسکریت پسندوں کی ایک گاڑی شامل تھی جنہوں نے گاؤں سے گزرنے کی کوشش کی، تاہم گاؤں کے رہائشیوں کی حمایت سے علاقے میں تعینات شامی فوج کی چوکی نے انہیں روکنے اور پسپائی پر مجبور کرنے میں کامیابی حاصل کی۔

رپورٹ کے مطابق دیہاتیوں نے امریکی فوجی قافلے پر پتھراؤ کیا، جس سے وہ علاقہ چھوڑنے پر مجبور ہوگیا،واضح رہے کہ شام کا الجزیرہ علاقہ ہمیشہ امریکی قابض افواج کے قافلوں کو روکنےاور انہیں واپس جانے پر مجبور کرنے میں اس علاقے کے باشندوں کے اقدامات کا گواہ رہا ہے۔

یادرہے کہ یہ اقدام امریکی جارحیت اوراس خطے کے وسائل کی لوٹ مار کے جواب میں کیا گیا ہے قابل ذکر ہے کہ امریکہ اپنی حمایت یافتہ کرد ملیشیاؤں کی مدد سے مشرقی اور شمال مشرقی شام میں تیل کے وسائل کو لوٹ رہا ہےجبکہ شامی حکومت بارہا کہہ چکی ہے کہ امریکی موجودگی قابض ہے اور وہ اسے ختم کرے گی۔