رواں سال میں شہید ہونے والے فلسطینی بچوں کے چونکا دینے والے اعدادوشمار!

?️ 12 جون 2023

سچ خبریں:صیہونی ذرائع ابلاغ نے ایک چونکا دینے والی رپورٹ میں مقبوضہ فلسطین میں قابض فوج کے ہاتھوں شہید ہونے والے فلسطینی بچوں اور نوعمروں کی تعداد کا انکشاف کیا ہے۔

صیہونی میڈیا نے اعدادوشمار شائع کرتے ہوئے اعلان کیا ہے کہ رواں سال کے آغاز سے اب تک 28 فلسطینی بچے اور نوجوان صہیونی غاصب فوج کے فوجیوں کے ہاتھوں شہید ہو چکے ہیں۔

فلسطینی خبر رساں ایجنسی سما نے صہیونی اخبار ہارٹیز کے حوالے سے بتایا ہے کہ اس سال کے آغاز سے اب تک مقبوضہ فلسطین میں مختلف تنازعات میں قابض فوجیوں کے ہاتھوں 28 فلسطینی بچے اور نوعمر شہید ہو چکے ہیں۔

رپورٹ کے مطابق17 سالہ فواد عابد کو صیہونی فوجیوں نے کفردان گاؤں میں پیٹ اور ران میں گولی مار کر شہید کر دیا،اس کے علاوہ15 سالہ آدم عیاد کو الدہیشہ کیمپ پر اسرائیلی فوجیوں کے حملے کے دوران پیٹھ اور بازو میں گولی لگی اور وہ شہید ہو گیا۔

16 سالہ عامر زیتون کو صہیونی فوج نے بلاطہ کیمپ میں جھڑپوں کے دوران سر اور ہاتھ میں گولیاں مار کر شہید کردیا،14 سالہ عمر الخمور کو بھی الدہیشہ کیمپ میں سر میں گولی مار کر شہید کر دیا گیا۔

اس کے علاوہ 17 سالہ ودیع ابو رموز کو صیہونیوں نے مقبوضہ بیت المقدس کے قصبے سیلوان میں جھڑپوں میں شہید کر دیا،شعفاط کیمپ پر صہیونی حملے میں 16 سالہ محمد علی کو گولی مار کر شہید کر دیا گیا۔

17 سالہ عبداللہ موسی کو جنین کیمپ میں صہیونیوں نے سینے میں گولی مار کر شہید کر دیا نیزجنین کیمپ میں 16 سالہ وسیم ابو جاموس کو بھی اسرائیلی گشتی پارٹی نے گاڑی سے کچل کر شہید کر دیا جبکہ حال ہی میں نبی صالح گاؤں میں رہنے والے ڈھائی سالہ محمد التمیمی کو صیہونی درندوں نے شہید کر دیا۔