رفح گزرگاہ سے غزہ واپسی پر فلسطینی خاتون کی دردناک  داستان

رفح گزرگاہ سے غزہ واپسی پر فلسطینی خاتون کی دردناک  داستان

رفح سرحدی گزرگاہ کے راستے غزہ واپس آنے والی ایک فلسطینی خاتون نے اسرائیلی فوج اور ان کے مسلح کارندوں کے ہاتھوں پیش آنے والے خوفناک سلوک کی دل دہلا دینے والی تفصیلات بیان کی ہیں۔

فلسطینی خبر رساں ادارے کے مطابق صباح الرقاب نامی خاتون نے بتایا کہ فلسطینی حصے میں داخل ہوتے ہی انہیں شدید تذلیل، خوف اور سخت پوچھ گچھ کے ایک نہ ختم ہونے والے سلسلے کا سامنا کرنا پڑا۔ ان کا کہنا تھا کہ انہیں خاردار تاروں سے گھیرے گئے ایک طویل راستے سے گزارا گیا جہاں ان کا تمام سامان، حتیٰ کہ بچوں کے کھلونے اور خوشبوئیں بھی “ممنوعہ اشیاء” کے بہانے ضبط کر لی گئیں۔

صباح الرقاب نے بتایا کہ انہیں تقریباً پندرہ منٹ تک خاردار تاروں کے درمیان پیدل چلنے پر مجبور کیا گیا، اس کے بعد انہیں ایک بس میں سوار کیا گیا جس کے آگے اور پیچھے اسرائیلی فوجی جیپیں موجود تھیں۔ یہ قافلہ انہیں کفر موراج کے علاقے میں واقع ایک چیک پوسٹ تک لے گیا جو غسان الدہینی نامی مسلح گروہ کے زیرِ کنٹرول تھی۔

انہوں نے بتایا کہ مسلح افراد نے ان کی مکمل اور توہین آمیز تلاشی لی، پاسپورٹ ضبط کیے اور پھر انہیں تقریباً تیس میٹر دور ایک اسرائیلی فوجی چیک پوسٹ کے حوالے کر دیا۔ شدید سردی، خوف اور مسلسل دباؤ نے ان کی ذہنی حالت کو مزید خراب کر دیا تھا۔

فلسطینی خاتون کے مطابق مسلح افراد بار بار ان سے پوچھتے رہے کہ آیا ان کے خاندان میں حماس کا کوئی رکن ہے یا وہ کسی ایسے شخص کو جانتی ہیں جو اس تحریک سے وابستہ ہو، مگر ان کے پاس ان سوالات کا کوئی جواب نہیں تھا۔

انہوں نے بتایا کہ اسرائیلی چیک پوسٹ پر پہنچنے کے بعد ایک نیا مرحلہ شروع ہوا، جہاں تقریباً دو گھنٹے تک انفرادی تفتیش اور تلاشی لی جاتی رہی۔ اس دوران ان کے ہاتھ باندھ دیے گئے اور آنکھوں پر پٹی باندھی گئی، جس سے خوف مزید بڑھ گیا، خاص طور پر انہیں اپنی بیٹیوں کے بارے میں شدید تشویش لاحق رہی۔

صباح الرقاب نے کہا کہ قابض فوج کی زیادہ تر پوچھ گچھ حماس سے تعلق اور مصر کے شہر العریش میں مبینہ روابط کے گرد گھومتی رہی۔

انہوں نے یہ بھی انکشاف کیا کہ ایک اسرائیلی افسر نے ان سے پوچھا کہ وہ غزہ واپس جانے پر اتنی بضد کیوں ہیں، اور انہیں اپنی پانچ بیٹیوں کے ساتھ مصر واپس جانے پر آمادہ کرنے کی کوشش کی، یہاں تک کہ رہائش فراہم کرنے کی پیشکش بھی کی، تاہم انہوں نے تمام تر دباؤ کو سختی سے مسترد کر دیا۔