رفح کراسنگ میں کسی بھی رکاوٹ کو جنگ بندی کی خلاف ورزی سمجھا جائے گا:حماس

رفح کراسنگ میں کسی بھی رکاوٹ کو جنگ بندی کی خلاف ورزی سمجھا جائے گا:حماس

 فلسطینی مزاحمتی تحریک حماس نے کہا ہے کہ رفح سرحدی گزرگاہ پر اسرائیل کی جانب سے کسی بھی قسم کی رکاوٹ، پابندی یا پیشگی شرط عائد کرنا جنگ بندی معاہدے کی صریح خلاف ورزی کے مترادف ہے۔

غیر ملکی خبر رساں اداروں کے مطابق، حماس نے اتوار کو جاری اپنے بیان میں واضح کیا کہ رفح کراسنگ کے حوالے سے اسرائیلی اقدامات قابلِ قبول نہیں اور ایسے کسی بھی عمل کو جنگ بندی کی خلاف ورزی سمجھا جائے گا۔

بیان میں حماس نے جنگ بندی کے ثالثوں اور ضامن ممالک سے مطالبہ کیا کہ وہ رفح کراسنگ پر قابض اسرائیلی حکام کے طرزِ عمل پر گہری نظر رکھیں، تاکہ غزہ کو کسی نئے محاصرے یا پابندیوں کا سامنا نہ کرنا پڑے۔

یہ بیان ایسے وقت میں سامنے آیا ہے جب صہیونی ذرائع ابلاغ نے اطلاع دی کہ رفح کراسنگ کو یورپی یونین اور مصر کے نمائندوں کی موجودگی میں دوبارہ کھول دیا گیا ہے۔ اسرائیلی چینل 12 کے مطابق، ابتدائی مرحلے میں 150 افراد کو رفح کراسنگ کے ذریعے آمدورفت کی اجازت دی گئی ہے۔

ادھر اسرائیلی اخبار یدیعوت آحارانوت نے ذرائع کے حوالے سے رپورٹ کیا کہ رفح کراسنگ کو آج آزمائشی بنیادوں پر کھولا گیا ہے، جبکہ کل سے اسے دونوں سمتوں میں آمدورفت کے لیے مکمل طور پر فعال کیا جائے گا۔

حماس نے ایک بار پھر اس بات پر زور دیا کہ رفح کراسنگ سے متعلق کسی بھی قسم کی اسرائیلی رکاوٹ یا تاخیری حربہ جنگ بندی معاہدے کی روح کے منافی ہے۔