خواتین اور بچیوں کو محروم کرکے افغانستان کامیاب نہیں ہوسکتا

خواتین اور بچیوں کو محروم کرکے افغانستان کامیاب نہیں ہوسکتا

اقوام متحدہ میں برطانیہ کے نائب نمائندے جیمز کاریوکی نے کہا ہے کہ افغانستان اس وقت شدید انسانی اور اقتصادی بحران کا سامنا کر رہا ہے اور اگر خواتین اور بچیوں کو سماجی و تعلیمی میدان سے محروم رکھا گیا تو یہ ملک کبھی ترقی نہیں کرسکے گا۔

انہوں نے بدھ کے روز سلامتی کونسل کے اجلاس میں خطاب کرتے ہوئے افغانستان میں 31 اگست کے تباہ کن زلزلے پر افسوس کا اظہار کیا اور کہا کہ متاثرہ خواتین کی ضروریات پوری کی جانی چاہئیں اور خواتین امدادی کارکنوں کو متاثرہ علاقوں میں خدمات سرانجام دینے کی اجازت ہونی چاہیے۔

برطانوی سفیر نے بتایا کہ ان کا ملک حالیہ دنوں میں امداد میں 4 ملین ڈالر سے زائد کا اضافہ کر چکا ہے، جس کے بعد مجموعی برطانوی تعاون 5.4 ملین ڈالر تک پہنچ گیا ہے۔ انہوں نے کہا کہ خشک سالی اور غذائی قلت کے بڑھتے خطرات تشویشناک ہیں اور یہ ضروری ہے کہ دورافتادہ علاقوں میں رہنے والے افغان شہری سردیوں میں بھوک کا شکار نہ ہوں۔

انہوں نے مزید کہا کہ طالبان کو چاہیے کہ فوری طور پر خواتین کی ملازمت پر عائد پابندی ختم کریں، کیونکہ افغان خواتین کی شمولیت کے بغیر ملک کی ترقی اور پائیدار استحکام ممکن نہیں۔

برطانوی نمائندے نے اس بات پر بھی زور دیا کہ لندن اقوام متحدہ کی قیادت میں جاری امن و استحکام کے اقدامات کی حمایت جاری رکھے گا۔