جب تک ہماری شرائط پوری نہیں ہوتیں، ہم افغانستان کے اثاثے جاری نہیں کریں گے: امریکہ

?️ 10 دسمبر 2021

سچ خبریں:امریکی نمائندہ خصوصی برائے افغانستان کا کہنا ہےکہ وہ افغان عوام کی صورتحال سے آگاہ ہیں ،تاہم جب تک طالبان امریکہ کے مطالبات تسلیم نہیں کرتے ان کے اثاثے جاری نہیں کیے جائیں گے۔
افغانستان کے لیے امریکہ کے خصوصی ایلچی تھامس ویسٹ نے کہا کہ ہم افغانستان کے بارے میں آگاہ ہیں،تاہم جب تک طالبان ہمارے مطالبات پر عمل نہیں کرتے ان کےضبط کیے گئے اثاثے جاری نہیں کیے جائیں گے اور طالبان کو تسلیم نہیں کیا جائے گا۔

امریکی خصوصی ایلچی نے مزید کہا کہ امریکہ اور اس کے اتحادیوں کو ابھی تک یقین نہیں ہے کہ طالبان واقعی خواتین کے حقوق کا احترام کریں گے،درایں اثنا افغانستان میں انٹرنیشنل کمیٹی آف ریڈ کراس (ICRC) کے ڈائریکٹر وکی اکن نے کہاکہ بین الاقوامی پابندیاں، بینکنگ پابندیاں اور بین الاقوامی برادری کا طالبان کو تسلیم کرنے سے انکار وہ تمام عوامل ہیں جو امدادی تنظیموں کے کام میں رکاوٹ ہیں۔

اقوام متحدہ کے لیے طالبان کے مقرر کردہ نمائندے سہیل شاہین نے کہاکہ مغرب جان بوجھ کر افغانستان میں اقتصادی بحران کو ہوا دے رہا ہے اور افغانستان کو مشکل معاشی صورتحال میں ڈالنا چاہتا ہےجبکہ انھیں معلوم ہے کہ اس ملک میں انسانی بحران ہے۔

انھوں نے کہا کہ ہم ایک مشکل موسم سرما کا سامنا کر رہے ہیں اور ہمیں امید ہے کہ مالی اور انسانی امداد افغانستان پہنچ جائے گی، کیونکہ لوگ بہت مشکل حالات میں ہیں،ادھر بین الاقوامی مالیاتی فنڈ کے ترجمان گیری رائس نے کہاکہ جب تک افغانستان میں طالبان کی زیر قیادت حکومت کو تسلیم کرنے کے بارے میں بین الاقوامی برادری کا موقف واضح نہیں ہو جاتا افغانستان کے ساتھ اس کے تعلقات معطل رہیں گے۔