بھارت 114 نئے رافائل جنگی طیاروں کی خریداری کا منصوبہ بنا رہا ہے:بھارتی میڈیا

بھارت 114 نئے رافائل جنگی طیاروں کی خریداری کا منصوبہ بنا رہا ہے:بھارتی میڈیا

 بھارتی فضائیہ (IAF) نے اپنی جنگی صلاحیت بڑھانے اور پرانے جہازوں کو ریٹائر کرنے کے بعد پیدا ہونے والی کمی کو پُر کرنے کے لیے 114 جدید رافائل ملٹی رول جنگی طیارے خریدنے کی تجویز حکومت کو پیش کی ہے۔ یہ اقدام چین اور پاکستان کے مقابلے میں فضائی طاقت کو مزید مضبوط بنانے کے مقصد سے کیا جا رہا ہے۔

بھارتی اخبار دی ٹریبیون کے مطابق، 26 ستمبر 2025 کو دو اسکواڈرن میگ-21 طیارے سروس سے نکال دیے جائیں گے، جس کے بعد فضائیہ کی طاقت گھٹ کر 29 اسکواڈرن رہ جائے گی۔ یہ تعداد گزشتہ چھ دہائیوں میں بھارتی فضائیہ کی سب سے کم سطح ہو گی۔ اسی وجہ سے فی الحال کم از کم دو نئے اسکواڈرن، یعنی 36 تا 38 رافائل طیارے فوری طور پر درکار ہیں۔

بھارت کے پاس اس وقت 36 رافائل جنگی طیارے پہلے سے موجود ہیں، جب کہ ملکی بحریہ نے بھی 26 طیاروں کا آرڈر دیا ہے۔ نئی تجویز کے بعد بھارتی فضائیہ کے پاس مجموعی طور پر بڑی تعداد میں رافائل شامل کرنے کا منصوبہ ہے۔

بھارتی کابینہ کی سلامتی کونسل (CCS) نے طے کیا ہے کہ پاکستان اور چین کے ساتھ ممکنہ دو محاذوں پر جنگ کے خطرے کے پیش نظر فضائیہ کی طاقت کو 42 اسکواڈرن تک بڑھایا جائے۔ اسی حکمتِ عملی کے تحت 114 نئے رافائل طیاروں کی خریداری پر غور کیا جا رہا ہے۔یہ فیصلہ بھارتی فضائیہ کو خطے میں برتری دلانے اور دونوں پڑوسی ممالک کے خلاف توازنِ طاقت برقرار رکھنے کی کوشش کا حصہ ہے۔