ایران سے تعلقات دوبارہ بحال ہو سکتے ہیں: جولانی

ایران سے تعلقات دوبارہ بحال ہو سکتے ہیں: جولانی

شام کی عبوری حکومت کے سربراہ احمد الشرع نے کہا ہے کہ اگرچہ بشار الاسد حکومت کے خاتمے کے بعد شام اور ایران کے تعلقات میں سردمہری آئی، لیکن یہ اختلافات دائمی نہیں ہوں گے۔

جولانی نے شامی نیوز چینل الاخباریہ کو انٹرویو دیتے ہوئے کہا کہ دمشق خطے میں امن چاہتا ہے اور کسی بھی ملک کے ساتھ تناؤ یا دشمنی نہیں چاہتا۔ انہوں نے زور دیا کہ شام کی پالیسی ہمیشہ خودمختاری اور قومی مفاد پر مبنی ہوگی۔

جولانی  نے انکشاف کیا کہ شام اسرائیل کے ساتھ 1974 کے سکیورٹی معاہدے یا اس کے متبادل پر بات کر رہا ہے۔ ان کے مطابق، اسرائیل شام کو ایک مستقل تنازع کا میدان بنانا چاہتا تھا اور ملک کو تقسیم کرنے کا منصوبہ رکھتا تھا۔

انہوں نے واضح کیا کہ روس شام کے لیے ایک اہم اتحادی ہے اور دونوں ممالک کے تعلقات کو پُرسکون اور سنجیدہ انداز میں آگے بڑھایا جانا چاہیے۔

احمد الشرع نے بتایا کہ شام اس وقت ایک عبوری مرحلے سے گزر رہا ہے جس میں صدارتی خلا کو پُر کرنے، پارلیمانی انتخابات اور آئین سازی جیسے اقدامات شامل ہیں۔

انہوں نے کہا کہ سویدا میں حالیہ کشیدگی قبائلی اور مقامی اختلافات کا نتیجہ تھی، جسے ختم کرنے کے لیے تحقیقاتی کمیٹیاں قائم کر دی گئی ہیں۔

اس نے کہا کہ شام کسی بھی قیمت پر اپنی سرزمین کا ایک انچ بھی نہیں چھوڑے گا۔ انہوں نے شامی ڈیموکریٹک فورسز (قسد) کے ساتھ جاری مذاکرات کو اہم قرار دیتے ہوئے کہا کہ کچھ رکاوٹوں کے باوجود معاہدہ مکمل کرنے کی کوشش جاری ہے۔

شامی عبوری حکومت کے سربراہ نے کہا کہ ملک کی معیشت کو دوبارہ کھڑا کرنے کے لیے عملی اقدامات کیے جا رہے ہیں۔ گزشتہ نو ماہ میں 1150 نئی پیداواری لائنیں شروع کی گئی ہیں جبکہ کئی فیکٹریاں دوبارہ بحال کی گئی ہیں۔

ان کا کہنا تھا ہم سیاسی شرائط پر ملنے والی امداد یا قرضوں پر انحصار نہیں کرنا چاہتے، بلکہ سرمایہ کاری کے دروازے کھولنے پر یقین رکھتے ہیں۔