ایران روس ڈرون معاہدے پر صیہونیوں کی تشویش

?️ 20 جولائی 2022

سچ خبریں:صیہونی حکومت کے متعدد حلقوں اور فوج نے تصدیق کی ہے کہ اگر روس کو ایرانی ڈرونز کی فروخت کی خبر درست ہے تو صیہونی حکومت کو نئے خطرات کا سامنا کرنا پڑے گا۔
عربی 21 ویب سائٹ کے مطابق روس کو ایرانی ساختہ ڈرونز فروخت کرنے کے معاہدے پر دستخط کے امکان اور اس کے ساتھ ساتھ فوجی مشنز کے لیے اس قسم کے طیاروں کے استعمال میں اضافے نے صیہونی حکومت کے عسکری حلقوں کو سخت تشویش میں مبتلا کر دیا ہے۔

رپورٹ کے مطابق صیہونی عسکری حلقوں نے اس ممکنہ معاہدے کو تشویشناک قرار دیتے ہوئے اعلان کیا ہے کہ اس معاہدے سے شام کی فضائی حدود میں اس حکومت کے طیاروں کے آپریشن کی آزادی پر منفی اثرات مرتب ہوں گے جبکہ اس سے قبل صیہونی حکومت بغیر کسی پابندی اور رکاوٹ کے شام کی خودمختاری کی خلاف ورزی کرتی رہی ہے۔

اسرائیلی فوج کے ترجمان رون کوخامی نے کہا کہ ہمیں امید ہے کہ موسم گرما پرسکون رہے گا ،تاہم ہماری فوج کا مشن دفاعی ، حملے اور انٹیلی جنس سرگرمیوں کے لیے تیاری کرنا ہے، کیونکہ ہم ایک بہت ہی پیچیدہ خطے میں ہیں، اسی لیے ہم ہر جگہ دفاع اور حملے کرتے رہتے ہیں اور سکیورٹی معلومات اکٹھا کرتے رہتے ہیں۔

انہوں نے کہا کہ تہران اور ماسکو سے آنے والی خبریں تل ابیب کے لیے تشویشناک ہیں، وہ بھی خاص طور پر ایسے وقت میں زیادہ پریشان کن ہے کہ یہ خبریں ترکی اور روس کے صدور رجب طیب اردگان اور ولادیمیر پیوٹن کے دورہ ایران کے عین وقت پر شائع ہوئی ہیں۔