ایران اور امریکہ کے درمیان مذاکرات کے لئے عمان نے ایک بار پھر کردار ادا کرنے کی آمادگی ظاہر کر دی

?️ 20 نومبر 2025

ایران اور امریکہ کے درمیان مذاکرات کے لئے عمان نے ایک بار پھر کردار ادا کرنے کی آمادگی ظاہر کر دی

عمان کی وزارتِ خارجہ کے ایک اعلیٰ عہدے دار نے کہا ہے کہ ایران اور امریکہ کے درمیان غیرمستقیم مذاکرات کی تکمیل کے لیے مستقبل میں دوبارہ درمیانی کردار ادا کیے جانے کا امکان موجود ہے۔

شورائے تعاون خلیج فارس اور علاقائی گفت و شنید کے سربراہ شیخ احمد بن ہاشل المسکری نے بدھ کے روز ایرنا سے گفتگو میں بتایا کہ ایران اور عمان کے درمیان مسلسل رابطہ رہتا ہے اور جیسے ہی حالات سازگار ہوں، مسقط کی جانب سے ایران اور امریکہ کے درمیان بات چیت کی راہ ہموار کی جا سکتی ہے۔

انہوں نے کہا کہ عمان خطے میں مکالمے اور امن کا حامی ہے اور ایران کے ساتھ اس کے تعلقات نہ صرف تاریخی ہیں بلکہ پورے خطے کے مفاد میں ہیں۔ ان کے مطابق عمان اپنی خارجہ پالیسی میں کسی ملک کی پیروی نہیں کرتا، بلکہ سب سے پہلے اپنے قومی مفادات، پھر خلیجی تعاون کونسل اور آخر میں خطے کے مفادات کو مدنظر رکھتا ہے۔

شیخ المسکری نے ایک روز قبل عمان کے قومی دن کی مناسبت سے منعقدہ تقریب میں بھی کہا تھا کہ مسقط کی خارجہ پالیسی ’’مثبت غیرجانب داری‘‘ اور ہمسایوں سمیت عالمی برادری کے ساتھ دوستی کے اصول پر قائم ہے۔ انہوں نے اعتراف کیا کہ یہ پالیسی بعض مواقع پر مشکلات بھی لے کر آتی ہے، تاہم اسی وجہ سے عمان مختلف ممالک کے درمیان تنازعات میں مؤثر ثالث کا کردار ادا کرنے میں کامیاب رہا ہے۔

عمان اس ہفتے 20 نومبر سے احمد بن سعید بوسعیدی کی حکومت کے قیام کی 281 ویں سالگرہ منا رہا ہے۔ اس موقع پر ایک ہفتے تک جاری رہنے والی تقریبات میں متعدد سیاسی شخصیات اور مختلف ممالک کے صحافی شریک ہیں، جن میں ایران، مصر، اردن، عراق اور الجزائر کے نمائندگان بھی شامل ہیں۔