امریکی پارلیمنٹ میں سعودی عرب کو اسلحہ کی فراہمی کے خلاف بل پیش

?️ 6 فروری 2022

سچ خبریں:امریکی پارلیمنٹ کے دو اراکین نےایک بل پیش کیا ہے جس میں امریکہ کی جانب سے سعودی عرب کو اسلحہ کی فراہمی بندکرنے کا مطالبہ کیا گیا ہے۔
میڈل ایسٹ آئی کی رپورٹ کے مطابق ڈیموکریٹ پارٹی سے تعلق رکھنے والے دو امریکی اراکین پارلیمنٹ ٹام مالینوسکی اور جیم میک گورن نے ایک بل پارلیمنٹ میں پیش کیا ہے جس میں یہ مطالبہ کیا گیا ہے کہ امریکی وزارت جنگ کو اس بات کا پابند بنایا جائے کہ وہ دو سال تک ملکی کمپنیوں کو جنگ یمن میں مصروف سعودی فضائیہ کے جنگی طیاروں کے لئے تعمیراتی سروس فراہم کرنے کی اجازت نہ دے۔

اس حوالے سے میک گورن کا کہنا تھا کہ چھے سال سے زائد عرصے سے یمنی عوام سعودی عرب کے انسانیت سوز جرائم اور فضائی حملوں سے روبرو ہیں جو غلط اور ضمیر کے برخلاف ہے۔

امریکی پارلیمنٹ میں اس بل کی منظوری کی صورت میں امریکی کمپنیاں اس بات کی پابند ہو جائیں گی کہ وہ صرف سعودی عرب کی فضائیہ میں شامل اُن ایف پندرہ طیاروں کو میٹیننس سروس فراہم کریں جو امریکی ساخت ہوں اور دفاعی مقصد سے یمنی فورسز کے ڈرون طیاروں یا میزائل توانائی کو نشانہ بنانے کی غرض سے استعمال کئے جائیں۔

اسکے علاوہ اس بل کی ممکنہ منظوری کے بعد امریکی حکومت بھی اس بات کی پابند ہوگی کہ وہ ہر تین مہینے میں یمن پر سعودی عرب کے فضائی حملوں کے بارے میں کانگریس کو رپورٹ پیش کرے۔