امریکہ کی ایران کے خلاف قومی ایمرجنسی کی توسیع

?️ 5 مارچ 2022

سچ خبریں:امریکی صدر جو بائیڈن نے اسلامی جمہوریہ ایران کے خلاف قومی ہنگامی حالت میں ایک بار پھر توسیع کردی ہے۔
وائٹ ہاؤس کے 3 مارچ کو جاری ہونے والے ایک بیان کے مطابق ایران کے خلاف 15 مارچ 1995 کو نافذ ہونے والی قومی ایمرجنسی 15 مارچ 2022 کے بعد بھی بھرپور انداز میں برقرار رہے گی۔

واضح رہے کہ جو بائیڈن کے دعوے کے مطابق ایران کے اقدامات اور پالیسیاں امریکہ کی قومی سلامتی، خارجہ پالیسی اور معیشت کے لیے زبردست خطرہ بنی ہوئی ہیں، بیان میں مزید کہا گیاکہ امریکی صدر نے کہا کہ ان وجوہات کی بنا پر، میں نے فیصلہ کیا ہے کہ ایران کے حوالے سے قومی ہنگامی حالت کو برقرار رکھنا ضروری ہے جیسا کہ ایگزیکٹو آرڈر 12957 میں طے کیا گیا ہے اور اس خطرے کے جواب میں ایران کے خلاف جامع پابندیاں برقرار رکھنا ضروری ہے۔

قابل ذکر ہے کہ ایک طرف ایران اور مغربی ممالک کے درمیان کئی مہینوں سے ایٹمی سرگرمیوں کے سلسلہ میں مذاکرات جاری ہیں جنہیں ظاہری طور پر امریکہ کی بھی حمایت حاصل ہے اور دوسری طرف امریکی حکام کے اس طرح کے اقدامات مذاکرات کی راہ میں رکاوٹ بن رہے ہیں جسے لے کر متعدد عالمی حلقوں میں تشویش پائی جاتی ہے۔