امریکا کا وینزویلا کے خلاف فوجی کارروائی کے بجائے معاشی دباؤ میں اضافہ

امریکا کا وینزویلا کے خلاف فوجی کارروائی کے بجائے معاشی دباؤ میں اضافہ

 امریکی حکام کے مطابق آئندہ دو ماہ کے دوران امریکا وینزویلا کے خلاف اپنی پالیسی میں معاشی دباؤ کو مزید سخت کرنے پر توجہ دے گا، جبکہ تیل سے متعلق پابندیاں بدستور جاری رہیں گی۔

خبر رساں ادارے رائٹرز کے حوالے سے الجزیرہ نے رپورٹ کیا ہے کہ ایک امریکی عہدیدار نے نام ظاہر نہ کرنے کی شرط پر بتایا کہ واشنگٹن اس وقت فوجی دباؤ کے مقابلے میں اقتصادی پابندیوں کو زیادہ مؤثر ذریعہ سمجھ رہا ہے۔ ان کا کہنا تھا کہ اگرچہ فوجی آپشن بدستور موجود ہے، تاہم وائٹ ہاؤس کی فوری ترجیح پابندیوں کے ذریعے مطلوبہ سیاسی اہداف حاصل کرنا ہے۔

رپورٹ کے مطابق وائٹ ہاؤس نے امریکی فوج کو ہدایت دی ہے کہ خطے میں موجودگی برقرار رکھتے ہوئے بنیادی طور پر وینزویلا کے تیل پر عائد پابندیوں کے نفاذ اور سمندری نگرانی پر توجہ مرکوز کی جائے۔ اسی پالیسی کے تحت امریکی فورسز اب تک دو تیل بردار جہاز ضبط کر چکی ہیں جبکہ تیسرے کا تعاقب جاری ہے۔

گزشتہ ماہ کیریبین خطے میں کشیدگی اس وقت بڑھی جب امریکی صدر ڈونلڈ ٹرمپ کے حکم پر تقریباً 15 ہزار فوجی، ایک طیارہ بردار بحری جہاز، میزائل بردار جنگی جہاز اور آبی و بری حملہ آور جہاز تعینات کیے گئے۔ یہ کئی دہائیوں میں خطے میں امریکی فوج کی سب سے بڑی تعیناتی سمجھی جا رہی ہے، جس نے وینزویلا کے خلاف ممکنہ فوجی کارروائی کے خدشات کو جنم دیا۔

امریکی حکام کا مؤقف ہے کہ یہ اقدامات منشیات اسمگلنگ اور بین الاقوامی جرائم پیشہ گروہوں کے خلاف ہیں، تاہم ناقدین کے مطابق وینزویلا کے تیل کی ناکہ بندی عملی طور پر ایک جنگی اقدام کے مترادف ہو سکتی ہے۔ اگرچہ ان کارروائیوں میں زیادہ تر امریکی کوسٹ گارڈ شامل ہے، جو امن کے زمانے میں ایک سول ادارہ تصور کیا جاتا ہے، لیکن سمندری محاصرہ بین الاقوامی قوانین کے تحت تنازع کا باعث بن سکتا ہے۔

وینزویلا نے اقوام متحدہ کی سلامتی کونسل کو بھیجے گئے بیان میں تیل بردار جہازوں کی ضبطی کو بحری قزاقی سے بھی بدتر قرار دیا ہے۔ یاد رہے کہ وینزویلا کی معیشت کا بڑا انحصار تیل پر ہے اور 2005 سے جاری امریکی پابندیاں، خصوصاً 2019 میں توانائی کے شعبے پر عائد کی گئی پابندیاں، ملک کی معیشت کو شدید متاثر کر چکی ہیں۔

ادھر وائٹ ہاؤس کا دعویٰ ہے کہ وینزویلا کے صدر نکولس مادورو منشیات اسمگلنگ میں ملوث گروہوں کی حمایت کرتے ہیں، جنہیں امریکا دہشت گرد تنظیمیں قرار دیتا ہے۔ اسی تناظر میں ستمبر سے اب تک امریکی فضائی حملوں میں درجنوں کشتیوں کو نشانہ بنایا گیا، جن کے بارے میں کہا گیا کہ وہ منشیات لے جا رہی تھیں۔ ان حملوں میں کم از کم 105 افراد کی ہلاکت کی اطلاعات ہیں، جبکہ یہ کارروائیاں کانگریس کی منظوری کے بغیر کی گئیں۔

مجموعی طور پر امریکا اور وینزویلا کے درمیان کشیدگی بدستور برقرار ہے، اور موجودہ اشارے بتاتے ہیں کہ آنے والے عرصے میں اقتصادی پابندیاں اس تنازع کا مرکزی ہتھیار رہیں گی۔