افغان خواتین کے امور کے لیے امریکی نمائندہ مقرر

?️ 31 دسمبر 2021

سچ خبریں:افغان نژاد امریکی سفارت کار رینا امیری کو امریکی محکمہ خارجہ کی جانب سے افغانستان کی خواتین اور لڑکیوں کے لیے خصوصی نمائندہ مقرر کر دیا گیا ہے۔
امریکی وزات خارجہ نے افغان نژاد امریکی رینا امیری کو افغان خواتین اور لڑکیوں کے لیے امریکی خصوصی نمائندہ اور سٹیفنی فوسٹر جو امریکی محکمہ خارجہ کی سابق ملازم ہیں، کو افغان خواتین اور لڑکیوں کی آبادکاری کے لیے سینئر مشیر مقرر کیا،امریکی وزیر خارجہ انتھونی بلنکن نے کہا ہم ایک پرامن، مستحکم اور محفوظ افغانستان چاہتے ہیں جس میں تمام افغان سیاسی، اقتصادی اور سماجی شعبوں میں رہتے ہوئے ترقی کریں لہذاخصوصی نمائندہ رینا امیری اس مقصد کے حصول کے لیے میرے ساتھ مل کر کام کریں گی۔

واضح رہے کہ گزشتہ دو دہائیوں کے دوران امیری اقوام متحدہ سمیت مختلف اداروں میں مختلف عہدوں پر فائز رہی ہیں نیز انھوں نے گزشتہ دو دہائیوں سے امریکی حکومت، اقوام متحدہ اور افغانستان سے متعلق تھنک ٹینکس اور تحقیقی مراکز کے لیے کام کیا ہے۔ انہوں نے سابق امریکی صدر براک اوباما کی انتظامیہ میں امریکی نمائندہ خصوصی برائے افغانستان اور پاکستان کے سینئر مشیر کے طور پر خدمات انجام دیں۔

امیری نیویارک یونیورسٹی کے عالمی امور کے مرکز میں ایک سینئر محقق بھی رہی ہیں اور افغانستان، علاقائی امن، سلامتی، اور ترقی سے متعلق پروگراموں کی سربراہ بھی رہی ہیں۔

کئی امریکی تھنک ٹینکس کے سینئر مشیر کے طور پر خدمات انجام دینے کے علاوہ، امیری بون معاہدے کے وقت اقوام متحدہ کے سکریٹری جنرل برائے افغانستان کی نمائندگی کرنے والی سیاسی ٹیم کے رکن تھیں۔