اسرائیل کا لیزر دفاعی نظام آئرن بیم ہیک ہو گیا

اسرائیل کا لیزر دفاعی نظام آئرن بیم ہیک ہو گیا

 ایک ہیکر گروپ نے اسرائیل کے جدید لیزر دفاعی نظام آئرن بیم اور دیگر حساس فوجی ٹیکنالوجیز سے متعلق خفیہ معلومات تک رسائی حاصل کرنے کا دعویٰ کیا ہے۔

پیر کے روز موصولہ اطلاعات کے مطابق، اس سائبر گروپ نے، جو خود کو سائبر سپورٹ فرنٹ (Cyber Support Front) کہتا ہے، ایک ویڈیو جاری کی ہے جس میں انہوں نے اسرائیلی دفاعی کمپنی "مایا” میں کامیاب دراندازی کے شواہد دکھائے ہیں۔

خبر رساں ادارے قدس پرس کے مطابق، ویڈیو میں اسرائیلی فوج کے مختلف جدید ہتھیاروں اور سازوسامان کی تفصیلات دیکھی جا سکتی ہیں، جن میں جاسوسی ڈرون اسکائی لارک، فضائی دفاعی نظام اسپائیڈر، خفیہ کروز میزائل آئس بریکر اور دیگر جدید دفاعی مصنوعات شامل ہیں۔

رپورٹ میں مزید کہا گیا ہے کہ افشا شدہ دستاویزات میں اسرائیلی فوج کے آسٹریلیا اور کئی یورپی ممالک کے ساتھ مشترکہ دفاعی معاہدوں کی تفصیلات بھی موجود ہیں۔ تاہم اسرائیلی حکام نے تاحال اس واقعے پر کوئی ردعمل ظاہر نہیں کیا۔

قابل ذکر ہے کہ آئرن بیم اسرائیل کا ایک لیزر گائیڈڈ فضائی دفاعی نظام ہے جسے 11 فروری 2014 کو متعارف کرایا گیا اور 17 اگست 2020 کو باضابطہ طور پر فوج میں شامل کیا گیا۔

یہ نظام مختصر فاصلے تک مار کرنے والے راکٹوں اور مارٹر شیلز کو تباہ کرنے کے لیے تیار کیا گیا ہے، جس کی مؤثر رینج تقریباً 7 کلومیٹر (4.3 میل) ہے، جو اسرائیل کے آئرن ڈوم سسٹم کے قریب سمجھی جاتی ہے۔