آنے والا موسم سرما بہت مشکل ہوگا:فرانسیسی صدر

?️ 9 اکتوبر 2022

سچ خبریں:فرانسیسی صدر ایمانوئل میکرون نے اس ملک کی پارلیمنٹ میں سربراہان مملکت کے اجلاس میں اپنے ریمارکس میں کہا کہ 2023/2024 کا موسم سرما رواں سال کے موسم سرما کی نسبت گیس کی فراہمی کے لحاظ سے بہت زیادہ مشکل ہوگا۔

روئٹرز خبر رساں ادارے کی رپورٹ کے مطابق میکرون نے اپنی تقریر کے ایک حصے میں کہا کہ اگلے سال کا موسم سرما یورپیوں کے لیے سخت ترین سردیوں میں سے ایک ہوگا، تاہم یورپ گیس فراہم کرنے والوں کے ساتھ بات چیت کو تیز کرے گا اور گیس کی خریداری کے لیے بڑے ایشیائی شراکت داروں کے ساتھ رابطہ قائم کرے گا۔

انہوں نے کہا کہ توانائی کی خریداری کے لیے یورپی ممالک کے درمیان مالیاتی یکجہتی کو یقینی بنانے کے لیے میکانزم بھی قائم کیے جائیں گے، اس کے علاوہ اجلاس کے بعد ایمانوئل میکرون نے صحافیوں کے ساتھ گفتگو کرتے ہوئے کہا کہ انہوں نے یوکرین کو ہتھیاروں کی خریداری میں مدد کے لیے 100 ملین ڈالر (98 ملین یورو) کا فنڈ بنایا ہے اور یہ بھی کہا کہ توپوں کی خریداری کے لیے خاص طور پر ڈنمارک کے ساتھ بات چیت جاری ہے۔

انہوں نے مزید کہا کہ یوکرین کو دیا جانے والے یہ ساز و سامان ان 18 توپوں کے علاوہ ہے جو فرانس نے پہلے یوکرین کو بھیجی تھیں، یاد رہے کہ اس وقت یوکرین پر روس کے حملوں کے بہانے یورپی ممالک نے ماسکو کے خلاف توانائی کی پابندیاں عائد کر رکھی ہیں جس کی وجہ سے وہ خود چیلنج کا شکار ہیں۔