امریکہ لبنان میں صیہونی جرائم کی حمایت کیوں کرتا ہے؟

سچ خبریں: امریکہ، مغرب اور اسرائیل کے عسکری-سیکیورٹی اتحاد کے خلاف، بہترین حکمت عملی یہ ہے کہ مزاحمتی تحریک کے ارکان کے درمیان تعلقات کو مضبوط کیا جائے اور وحدتِ میدان کی پالیسی کے تحت ان کی اسٹریٹجک صلاحیتوں میں اضافہ کیا جائے۔

17 اور 18 ستمبر کو حزب اللہ کے مواصلاتی نظام اور الیکٹرانک آلات پر حملوں کی شکل میں سامنے آنے والی موساد کی تخریبی کارروائیوں کے بعد بیروت اور تل ابیب کے درمیان کشیدگی میں مزید اضافہ ہوا۔

یہ بھی پڑھیں: مزاحمتی تحریک کے اتحاد نے تل ابیب کو کیسے نقصان پہنچایا؟

ان اسرائیلی دہشت گردانہ کارروائیوں کے جواب میں، لبنانی اسلامی مزاحمت نے اسرائیل کے شمالی علاقے میں الشومیرہ فوجی اڈے، معالیہ گولانی میں بریگیڈ 810 کے ہیڈکوارٹر، المطلہ بستی، ادمیت اور لیمان فوجی اڈوں کو نشانہ بنایا۔

دوسری طرف، اسرائیلی فوج نے بھی لبنان کے 50 مقامات پر حملے کیے۔ جنوبی لبنان میں ایک وسیع جنگ کے امکانات بڑھنے کے ساتھ ہی امریکی حکام نے ایک بار پھر خود کو ثالث کے طور پر پیش کرنے کی کوشش کی اور تنازع کے دونوں فریقوں سے کہا کہ وہ شمالی بحران کو سفارتی ذرائع سے حل کریں۔

تاہم اس انسانی چہرے کے برعکس، گزشتہ ایک سال کے دوران امریکیوں کی پالیسی نے واضح طور پر یہ ظاہر کیا ہے کہ وہ تل ابیب کی جنگی پالیسیوں کے ساتھ پوری طرح سے ہم آہنگ ہیں اور اسرائیلی فوج کو بڑے پیمانے پر ہتھیار فراہم کر رہے ہیں۔

اس تناظر میں، واشنگٹن کو غزہ اور لبنان میں قتل و غارت کے معاملے میں اسرائیل کا سب سے بڑا شریک قرار دیا جاتا ہے۔

امریکی حمایت اور ثالثی کا دوغلا کردار

گزشتہ ایک سال کے دوران بائیڈن انتظامیہ نے لبنان اور اسرائیل کے تنازع میں ثالث کے طور پر کردار ادا کرنے کی کوشش کی ہے اور بظاہر علاقے میں کشیدگی کو کم کرنے کی کوشش کی جا رہی ہے۔

اس عمل میں، وائٹ ہاؤس کے مشیر خاص برائے مشرق وسطیٰ عاموس ہوکشتائن کی ثالثی میں، صرف اسرائیلی مطالبات بیروت تک پہنچائے جا رہے ہیں۔

اسرائیل کا اہم مطالبہ یہ ہے کہ اقوام متحدہ کی سلامتی کونسل کی قرارداد 1701 پر عملدرآمد کیا جائے اور حزب اللہ کی رضوان فورسز کو دریائے لیتانی سے پیچھے ہٹایا جائے تاکہ اسرائیلی شمال میں آبادکار اپنے گھروں کو واپس جا سکیں۔

دوسری طرف، امریکہ ابھی تک غزہ میں جاری جنگ کے خاتمے اور ایک جامع جنگ بندی کے مطالبات پورے کرنے میں ناکام رہا ہے، جو کہ مزاحمتی نیٹ ورک کے اراکین اور اسلامی ممالک کی اولین خواہش ہے۔

یہ بات تقریباً تمام علاقائی اور بین الاقوامی کھلاڑیوں کے لیے واضح ہے کہ حزب اللہ کا بنیادی مطالبہ غزہ کی جنگ کا خاتمہ اور اس علاقے میں جاری نسل کشی کو روکنا ہے۔

امن کی باتیں، جنگ کی تیاری؛امریکہ کی دوہری پالیسی

امریکہ ایک طرف تو خود کو خطے میں امن کا علمبردار اور خیرخواہ ظاہر کرنے کی کوشش کرتا ہے لیکن حقیقت میں وہ اسرائیل کی عسکری حمایت کے ذریعے جنگی پالیسیوں کو آگے بڑھا رہا ہے۔ 18 اکتوبر 2023 کو امریکی کانگریس نے اسرائیل کے لیے 14.3 بلین ڈالر کی مالی امداد کا پیکج منظور کیا۔

اپریل 2024 میں، اسرائیل کو ایران اور مزاحمتی محور سے درپیش مبینہ خطرات کے پیش نظر، مزید 17 بلین ڈالر کی امداد کے لیے دونوں بڑی امریکی جماعتوں نے ایک اور پیکج پر ووٹنگ کروائی۔ مالی امداد کے ساتھ ساتھ واشنگٹن نے اسرائیل کو بڑی تعداد میں فوجی سازوسامان بھی فراہم کیا ہے۔

ان ہتھیاروں میں F-35 جنگی طیارے، F-15 بمبار طیارے، پیٹریاٹ میزائل ڈیفنس سسٹم، اور JDAM اور GBU جیسے گائیڈڈ بم شامل ہیں۔ اس کے علاوہ، ہلفائر میزائل، 155 ملی میٹر کے توپخانے کے گولے، MQ-9 ریپر ڈرونز، جیٹ ایندھن اور دیگر فوجی سازوسامان بھی اسرائیل کو فراہم کیے گئے ہیں۔

میڈیا رپورٹس کے مطابق، اکتوبر 2023 سے مارچ 2024 کے دوران، امریکہ نے اسرائیل کو 100 سے زیادہ اسلحے کی کھیپ بھیجی۔ یہ سلسلہ اس وقت بھی جاری رہا جب صدر بائیڈن نے اسرائیل کو رفح پر حملے نہ کرنے کی ہدایت دی تھی۔

کئی تجزیہ کاروں کا خیال ہے کہ اسرائیل، امریکی انٹیلیجنس اور تکنیکی مدد کے بغیر حزب اللہ لبنان کو شدید نقصان پہنچانے کی صلاحیت نہیں رکھتا۔

لبنان میں پیجرز اور مواصلاتی نظام کی تخریب کاری کے ابتدائی مراحل میں ہی کچھ سکیورٹی ماہرین نے موساد کو “GCHQ” اور امریکی “NSA” کی ممکنہ مدد کی جانب اشارہ کیا تھا۔

اس تخریب کاری سے 10 دن پہلے امریکی سینٹرل کمانڈ کے سربراہ جنرل مائیکل کوریلا فلسطینِ اشغالی کا دورہ کر چکے تھے اور انہوں نے حزب اللہ کے خلاف اسرائیلی کارروائیوں کے منصوبوں سے آگاہی حاصل کی تھی۔

اس سے قبل بھی، جیسے شہید کمانڈر عماد مغنیہ کے قتل میں، امریکی سیکیورٹی اداروں کی موساد کے ساتھ فعال شراکت داری واضح ہو چکی تھی۔ سابق سی آئی اے اہلکار ایڈورڈ اسنوڈن نے بھی دعویٰ کیا تھا کہ اس قسم کی تخریبی کارروائیاں سی آئی اے کی خصوصی مہارتوں میں شامل ہیں۔

شمالی محاذ پر طاقت کے توازن میں تبدیلی

گزشتہ 11 ماہ کے دوران شمالی محاذ پر طاقت کے توازن میں نمایاں تبدیلی آئی ہے اور حزب اللہ نے مقبوضہ فلسطین میں عام زندگی کو شدید متاثر کیا ہے۔

حزب اللہ کے حملوں کی وجہ سے 200,000 سے زیادہ صہیونی آبادکار اپنے گھروں سے بے گھر ہو چکے ہیں، اور ہفتہ وار مالی نقصان کا تخمینہ 180 ملین ڈالر لگایا گیا ہے۔

اس کے علاوہ، اسرائیل کے شمال میں واقع اہم اسٹریٹیجک مراکز جیسے ایندھن کے ذخائر اور کیمیائی فیکٹریوں نے لبنانی مزاحمت کے حملوں کے خوف سے اپنی سرگرمیاں معطل کر دی ہیں یا اپنے ذخائر کو خالی کر دیا ہے۔

اس صورتحال نے امریکی کمپنیوں کو بھی مقبوضہ علاقوں میں سرمایہ کاری یا کاروبار کرنے سے روک دیا ہے۔

اگرچہ بظاہر بائیڈن حکومت جنگ کی مخالفت کرتی ہے اور سفارتی ذرائع سے مسائل حل کرنے کی بات کرتی ہے، لیکن حقیقت میں وہ شمالی محاذ پر جنگ کے دائرے کو بڑھانے کی خواہاں ہے تاکہ درمیانی مدت میں حزب اللہ کے خطرے کو ختم کیا جا سکے۔

اگر مزاحمتی محور کا خطرہ برقرار رہا، تو امریکی حکومت چین کے ساتھ مؤثر طریقے سے مقابلہ نہیں کر پائے گی اور انڈو پیسیفک خطے میں چینی اثر و رسوخ کو روکنے میں مشکلات کا سامنا کرے گی۔

نتیجہ

واشنگٹن میں دونوں بڑی سیاسی جماعتوں کے درمیان اسرائیل کی غیر مشروط حمایت پر اتفاق نے مغربی ایشیا کے خطے میں ایک غیر متوازن صورتحال پیدا کر دی ہے۔ اسرائیل، جو ایشیا، یورپ اور افریقہ کے سنگم پر واقع ہے اور مغرب کا ایک “فوجی اڈہ” سمجھا جاتا ہے، اس خطے میں امریکی حریفوں اور دشمنوں کو قابو میں رکھنے کے لیے ذمہ دار ہے۔

اس جعلی ریاست کے پاس جوہری ہتھیار ہیں، جو اسے خطے میں ایک منفرد حیثیت فراہم کرتے ہیں، اور امریکہ اور یورپی ممالک مسلسل اسے جدید ہتھیاروں اور ٹیکنالوجی کی منتقلی میں مدد فراہم کر رہے ہیں۔

عالمی برادری کے سامنے مغربی ممالک اب انسانی حقوق کے دعوے پہلے کی طرح مؤثر طریقے سے استعمال نہیں کر سکتے، کیونکہ بین الاقوامی میڈیا اور سوشل میڈیا پلیٹ فارمز نے غزہ میں 41000 سے زائد بے گناہ خواتین اور بچوں کے قتل عام کو دیکھا ہے، جو امریکی ہتھیاروں سے سرانجام دیا گیا۔

اس نظامی-سیکیورٹی اتحاد کے خلاف بہترین حکمت عملی یہ ہے کہ مزاحمتی نیٹ ورک کے ارکان کے درمیان اتحاد اور اسٹریٹیجک طاقت کو مضبوط کیا جائے، اور وحدتِ میدان کی پالیسی پر عمل کرتے ہوئے ان کی مزاحمتی صلاحیتوں کو مزید بڑھایا جائے۔

اس وقت، ایسا لگتا ہے کہ اسرائیل، امریکی سینٹرل کمانڈ (سینٹکام) کی مدد سے، شمالی محاذ پر ایک نئی جنگ شروع کرنے کا ارادہ رکھتا ہے، جس کا جواز اسرائیلی آبادکاروں کی واپسی کا دعویٰ بنایا جا رہا ہے۔

مزید پڑھیں: انصار اللہ اور مزاحمت کے ناقابل تسخیر ہونے کا راز کیا ہے؟

یہ دعویٰ ایک ایسے وقت میں سامنے آیا ہے جب حزب اللہ کے سربراہ سید حسن نصراللہ نے 19 ستمبر کو واضح طور پر کہا کہ شمالی محاذ پر کشیدگی کو ختم کرنے کا واحد راستہ غزہ میں جنگ کا خاتمہ اور وہاں سے اسرائیلی افواج کا انخلا ہے۔