پیجر دھماکے کی تفصیلات سے لے کر علاقائی ترقی میں امام خامنہ ای کے کردار تک

سچ خبریں: لبنان کی حزب اللہ کے سیکرٹری جنرل شیخ نعیم قاسم نے المیادین نیٹ ورک کے ساتھ ایک انٹرویو میں خطے کے حالات اور ایران اور انقلاب کے رہنما کی مزاحمتی محور کے اہداف کی پیشرفت میں کردار پر روشنی ڈالی۔

شیخ نعیم قاسم نے غزہ کی جنگ کی حمایت، لبنان میں جاری جنگ، حزب اللہ کی موجودہ سیاسی و عسکری صورتحال، پیجرز واقعہ اور ایران سے متعلقہ واقعات پر تفصیلی گفتگو کی۔

حزب اللہ کے سیکرٹری جنرل نے کہا کہ صہیونی ریاست کے غزہ پر حملے کے بعد ہونے والی قیادتی میٹنگ میں یہ فیصلہ کیا گیا کہ غزہ کی حمایت محدود پیمانے پر کی جائے اور حالات کا جائزہ لے کر حتمی فیصلہ کیا جائے۔ انہوں نے کہا کہ چند ہفتوں بعد یہ نتیجہ نکالا گیا کہ حزب اللہ کو مکمل جنگ میں شامل نہیں ہونا چاہیے، کیونکہ بغیر مکمل جنگ کے بھی اہداف حاصل کیے جا سکتے تھے۔

انہوں نے حزب اللہ کے اہداف کو واضح کرتے ہوئے کہا کہ اسرائیلی فوجیوں کو شمالی علاقے میں مصروف رکھنا، آبادکاروں کو ہجرت پر مجبور کرنا، اور اسرائیلی فوجیوں کو زیادہ سے زیادہ نقصان پہنچانا شامل تھا۔

شیخ قاسم نے کہا کہ طوفان الاقصیٰ کے بارے میں کوئی پہلے سے ہم آہنگی نہیں تھی، اور حزب اللہ کو اس بارے میں معلومات نہیں تھیں۔ انہوں نے کہا کہ اگر ہمیں علم ہوتا تو ہم ضرور شامل ہوتے۔ انہوں نے یہ بھی بتایا کہ ایران کو بھی 7 اکتوبر کے آپریشن کے بارے میں معلومات نہیں تھیں۔

شیخ نعیم قاسم نے کہا کہ پیجرز میں لگے بم ایسے تھے جنہیں عام آلات سے پکڑنا ممکن نہیں تھا۔ انہوں نے بتایا کہ 1500 مزید بمبار پیجرز ترکی میں موجود تھے، جنہیں لبنان کے وزیر اعظم نجیب میقاتی کی درخواست پر تباہ کر دیا گیا۔

انہوں نے حزب اللہ میں ممکنہ سیکیورٹی خلاف ورزیوں کو محدود قرار دیتے ہوئے کہا کہ اگر کوئی ثبوت ملتا ہے تو عوام کو بتایا جائے گا۔

شیخ قاسم نے کہا کہ حزب اللہ صہیونی ریاست کے حملوں کو لامحدود برداشت نہیں کرے گا، لیکن انہوں نے واضح کیا کہ وہ ابھی کوئی حتمی فیصلہ نہیں بتا رہے۔ انہوں نے کہا کہ اسرائیل اگر لبنان پر حملہ کرے گا تو حزب اللہ ضرور جواب دے گا۔

شیخ نعیم قاسم نے کہا کہ ایران نے مالی، عسکری، سیاسی اور میڈیا سپورٹ دے کر مزاحمتی محور کو مضبوط کیا۔ انہوں نے کہا کہ امام خامنہ ای روزانہ غزہ اور لبنان کے حالات کا جائزہ لیتے ہیں اور ہر ممکن مدد فراہم کر رہے ہیں۔

شیخ قاسم نے کہا کہ سوریہ میں تبدیلیاں مزاحمتی محور کے لیے ایک دھچکا تھیں، کیونکہ سوریہ حزب اللہ کی فوجی مدد کا اہم ذریعہ تھا۔ انہوں نے اسرائیل کے ساتھ تعلقات کی معمول سازی کو خطرناک قرار دیا اور کہا کہ سوریہ کی عوام اسے قبول نہیں کریں گی۔

شیخ قاسم نے لبنان کی قومی سلامتی اور دفاعی حکمت عملی پر گفتگو جاری رکھنے پر زور دیا۔ انہوں نے کہا کہ لبنان کی طاقت اس کی فوج، عوام اور مزاحمت کا اتحاد ہے۔

انہوں نے کہا کہ حزب اللہ عرب ممالک کے ساتھ برابر کے تعلقات کے لیے تیار ہے، لیکن لبنان کو کسی کا محتاج نہیں بنانا چاہتا۔