عاطف اسلم نے غزہ کیلئے ایک کروڑ 50 لاکھ روپے عطیہ کردیے

?️ 22 اکتوبر 2023

کراچی: (سچ خبریں) نامور گلوکار عاطف اسلم نے فلسطینیوں سے اظہار یکجہتی کرتے ہوئے غزہ میں طبی اور خوراک کی فراہمی کے لیے ایک کروڑ 50 لاکھ روپے عطیہ کردیے۔

ایک ہفتے قبل عاطف اسلام نے انسٹاگرام پر فلسطینی پرچم پوسٹ کرتے ہوئے اسرائیلی جارحیت کا نشانہ بننے والے معصوم لوگوں سے اظہار یکجہتی کا اعلان کیا تھا۔

انہوں نے لکھا تھا کہ ’فلسطین میں معصوم جانوں کے ضیاع پر بے حد افسوس ہے، آئیے ایک ساتھ کھڑے ہوں اور فلسطینیوں کے شفا، امن اور امید کے لیے دعا کریں، اللہ اپنا رحم فرما۔‘

فلسطینیوں سے اظہار یکجہتی کے بعد گزشتہ روز گلوکار نے انسٹاگرام اسٹوری پر اعلان کیا انہوں نے غزہ کے لوگوں کے لیے الخدمت فاؤنڈیشن کو ایک کروڑ سے زائد رقم عطیہ کردی ہے۔

الخدمت فاؤنڈیشن کی جانب سے جاری کیے گئے پوسٹر کے مطابق عاطف اسلم نے الخدمت غزہ فنڈ کو فلسطین میں طبی امداد اور خوراک کی فراہمی کے لیے ایک کروڑ 50 لاکھ روپے عطیہ کیے ہیں۔

یاد رہے کہ کئی دہائیوں سے اسرائیل کی جانب سے فلسطینیوں پر بمباری کے بعد 7 اکتوبر کو حماس نے اسرائیل کے فوجی اڈوں اور بستیوں پر اچانک حملہ کیا تھا۔

اس حملے کے ردعمل میں گزشتہ دو ہفتوں سے اسرائیل کے جنگی طیارے غزہ کی پٹی پر مسلسل بمباری کر رہے ہیں، جس کے نتیجے میں معصوم بچوں سمیت ساڑھے 4 ہزار سے زائد افراد جاں بحق ہوچکے ہیں جبکہ ہزاروں زخمی ہیں۔

فلسطین کا محاصرہ ہفتے کو 15ویں روز میں داخل ہو گیا ہے اور غزہ میں ہر گزرتے لمحے کے ساتھ رسد ختم ہوتی جا رہی ہے، پاکستانی تنظیمیں امداد و رسد بھیج کر فلسطین کے لوگوں کی مدد کر رہی ہیں جن میں الخدمت فاؤنڈیشن بھی شامل ہے۔

الخدمت فاؤنڈیشن نے پاکستان میں جمع ہونے والی مالی امداد کو غزہ تک پہنچانے کے لیے آئی ایچ ایچ ہیومینٹیرین ریلیف فاؤنڈیشن، حیرت فاؤنڈیشن اور کینسویو ایسوسی ایشن جیسی ترک تنظیموں کے ساتھ اشتراک کیا ہے۔

عطیات ان کی ویب سائٹ پر آن لائن یا ان کے دفتر جاکر بذات خود دیے جا سکتے ہیں اور لین دین کا یہ تمام عمل پاکستانی روپوں میں ہو گا۔