بھارتی ریپر بادشاہ سے کیسے دوستی ہوئی؟ ہانیہ عامر نے بتادیا

?️ 25 مئی 2024

کراچی: (سچ خبریں) مقبول اداکارہ ہانیہ عامر نے پہلی بار بھارتی ریپر و گلوکار بادشاہ سے دوستی اور تعلقات پر بات کرتے ہوئے اس بات پر بھی شکوہ کیا ہے کہ ان کے غیر شادی شدہ ہونے کی وجہ سے بری خبریں پھیلائی جاتی ہیں۔

ہانیہ عامر نے حال ہی میں بی بی سی ایشین نیٹ ورک کو انٹرویو دیا، جس میں انہوں نے متعدد معاملات پر کھل کر بات کی۔

اسی انٹرویو کی وائرل ہونے والی ایک مختصر ویڈیو میں ہانیہ عامر نے بھارتی ریپر بادشاہ سے دوستی اور تعلقات پر بھی بات کی۔

وائرل ہونے والی ویڈیو میں جب میزبان نے اداکارہ سے بادشاہ سے دوستی اور تعلقات سے متعلق سوال کیا تو اداکارہ نے پہلے تو اسے ذاتی مسئلہ قرار دے کر فراریت اختیار کرنے کی کوشش کی لیکن میزبان نے انہیں یاد دلایا کہ وہ اداکارہ ہونے کی وجہ سے عوامی شخصیت ہیں۔

میزبان کے اصرار پر ہانیہ عامر نے مسکراتے ہوئے بتایا کہ ایک بار بادشاہ نے ان کی کسی انسٹاگرام ریل پر کمنٹ کیا تھا، جس متعلق مداحوں نے انہیں مینشن کرکے بتایا۔

ہانیہ عامر کا کہنا تھا کہ بادشاہ کی جانب سے پوسٹ پر کمنٹ کیے جانے کے بعد انہوں نے بھارتی گلوکار کو ڈائریکٹ میسیج (ڈی ایم) بھیجا اور ان سے دعا سلام کی، جس کے بعد ان کے درمیان دوستی ہوگئی۔

انہوں نے واضح کیا کہ ان کی بادشاہ کے ساتھ صرف دعا سلام والی دوستی ہے جب کہ ان سے تعلقات سے متعلق خبریں بے بنیاد اور جھوٹی ہیں، جنہیں پڑھ کر انہیں افسوس بھی ہوتاہے۔

ہانیہ عامر کا کہنا تھا کہ ان کے غیر شادی شدہ ہونے کی وجہ سے ہمیشہ ان کے تعلقات سے متعلق افواہیں اور خبریں پھیلائی جاتی ہیں۔

انہوں نے شکوہ کیا کہ ان کے غیر شادی شدہ ہونے میں ان کی کوئی غلطی یا قصور نہیں اور لوگوں کے صرف ان کی ازدواجی حیثیت کی وجہ سے ایسی خبریں نہیں پھیلانی چاہیے۔

ان کی بات سے میزبان نے بھی اتفاق کیا اور کہا کہ کسی کے بھی غیر شادی شدہ ہونے کی وجہ سے ان کے رومانوی تعلقات کی افواہیں نہیں پھیلائی جانی چاہییے۔

خیال رہے کہ ہانیہ عامر اور بادشاہ کے درمیان متحدہ عرب امارات (یو اے ای) میں ملاقاتوں کی ویڈیوز اور تصاویر پہلی بار دسمبر 2023 میں وائرل ہوئی تھیں، جس کے بعد دونوں سوشل میڈیا پر ایک دوسرے کے حوالے سے بات بھی کرتے دکھائی دیے۔

بعد ازاں دونوں کی دبئی میں ہی ملاقاتوں کی مزید ویڈیوز اور تصاویر وائرل ہوئیں، جس کے بعد ان کے درمیان تعلقات کی چہ مگوئیاں ہونے لگیں اور بعض افراد نے خیال ظاہر کیا کہ شاید دونوں کسی منصوبے میں ایک ساتھ بھی کام کریں۔

سوشل میڈیا پر افواہوں کے بعد اب ہانیہ عامر نے پہلی بار بادشاہ سے دوستی اور ان کے ساتھ تعلقات کی چہ مگوئیوں پر کھل بات کی ہے۔